CM Eknath Shinde On Modi Government: २०२४ ला सर्व रेकॅार्ड तुटतील, आम्हाला चिंता नाही; CM शिंदेंना ठाम विश्वास

Delhi News: आगामी लोकसभा निवडणुकीच्या (Lok Sabha Election) पार्श्वभूमीवर एकीकडे विरोधकांची बंगळुरूमध्ये बैठक सुरु आहे. तर दुसरीकडे दिल्लीमध्ये एनडीएची बैठक (NDA Meeting) होणार आहे. या बैठकीसाठी राज्याचे मुख्यमंत्री एकनाथ शिंदे (CM Eknath Shinde) हे देखील दिल्लीमध्ये दाखल झाले. यावेळी त्यांनी माध्यमांशी संवाद साधताना '२०२४ ला सर्व रेकॅार्ड तुटतील, आम्हाला चिंता नाही.', असा विश्वास व्यक्त केला आहे.

एकनाथ शिंदे यांनी माध्यमांशी संवाद साधताना मोदी सरकारच्या कामाचे कौतुक केले आहे. त्यांनी सांगितले की, 'मोदीसाहेबांनी ९ वर्षांत केलेले काम बोलणारे आहे. काँग्रेसला जे कधी जमलं नाही ते मोदीजींनी ९ वर्षांत केले आहे. अनेक योजना राबवल्या आहेत. जगभरात मोदीजींचा सन्मान केला जात आहे. २०२४ ही मोदीजींची नव्हे तर भारताची निवडणूक आहे. २०२४ ला सर्व रेकॅार्ड तुटतील.'

'अजित पवार पक्षात आल्याने महाराष्ट्रात एनडीए मजबूत झाली आहे. डबल इंजिनचं सरकार आल्याने महाराष्ट्राची स्थिती बदललीय. क्लीन स्वीप आम्हाला मिळेल. ही स्वार्थासाठी केलेली युती आहे. आमच्या महायुतीसोबत 210 आमदार आहेत. त्यामुळं आम्हाला चिंता नाही.', असे एकनाथ शिंदे यांनी स्पष्टपणे सांगितले.

एकनाथ शिंदे यांनी पुढे सांगितले की, 'एकीकडे विचारधारा असलेलं संघटन आहे. तर दुसरीकडे विरोधक नेता ठरवू शकत नाहीयेत. आत्मविश्वास गमावलेले विरोधक एकत्र आले आहेत. स्वार्थासाठी एकत्र आलेली ही लोकं आहेत. मोदीजींना बदनाम करण्यासाठी ते एकत्र आले आहेत.' तसंच, 'आपल्या देशाला बदनाम केलं जातंय ही कुठंली देशभक्ती?', असा सवाल त्यांनी उपस्थित केला आहे.

पंतप्रधान मोदी यांनी आपल्या देशाची अर्थव्यवस्था मजबूत केली आहे. संपूर्ण जगामध्ये आज आपल्या देशाचं नाव आदराने घेतले जात आहे. त्यामुळे विरोधक जेवढे आरोप लावतील तेवढं एनडीए बळकट होईल, असा विश्वास एकनाथ शिंदे यांनी व्यक्त केला आहे.