Madhya Pradesh News : कुनो नॅशनल पार्कमधून (Kuno National Park) फरार झालेला चित्ता ओवानला जेरबंद करण्यात अखेर यश आलं आहे. गेल्या सहा दिवसांपासून फरार असलेल्या ओवानला गुरुवारी वन विभागाने रेस्क्यू ऑपरेशन करत जेरबंद केलं. ओवानला घेऊन वन विभागाची टीम कुनो नॅशनल पार्कमध्ये दाखल झाली आहे. ओवानला जेरबंद केल्यानंतर वन विभागाच्या टीमने सुटकेचा निश्वास सोडला आहे.
गेल्या सहा दिवसांपासून ओवान चित्ता फरार होता. तो कुनो नॅशनल पार्कमधून बाहेर पडत रहिवासी भागामध्ये घुसला होता. या सहा दिवसांमध्ये तो वेगवेळ्या गावांमध्ये फिरत होता. यावेळी त्याने एका गायीची शिकार केली होती. चित्ता गावाच्या आसपास असल्यामुळे गावकऱ्यांमध्ये भीतीचे वातावरण होते. शेताकडे जाण्यासाठी गावकरी घाबरत होते. वन विभागाची टीम ओवानच्या प्रत्येक हालचालीवर नजर ठेवून होती.
ओवान स्वत:हून कुनो नॅशनल पार्कमध्ये परत जावा यासाठी वन विभागाच्या टीमकडून प्रयत्न सुरु होते. पण तो काय परत जाण्यास तयार नव्हता. त्यामुळे त्याला जेरबंद करण्यासाठी दक्षिण अफ्रीकेवरुन वाईल्ड लाईफ सेस्क्यू टीमला (wildlife team from africa) बोलावण्यात आले होते. गुरुवारी संध्याकाळी या स्पेशल टीमने बैराडनजीकच्या डाबरपुरा गावातून ओवानला जेरबंद केले. आता ओवानला पुन्हा कुनोमध्ये सोडण्यात येणार आहे.
ओवाननंतर मादी चित्ता आशा देखील फरार झाली आहे. मादी चित्ता आशा ही गेल्या चार दिवसांपासून कुनो नॅशनल पार्कच्या बाहेरील जंगलामध्ये फिरत आहे. आशाच्या देखील हालचालीवर वनविभाग नजर ठेवून आहे. गुरुवारी आशा वीरपूर गावातील प्रसिद्ध धौरेट सरकार मंदिराच्या जंगलामध्ये दिसली होती. हा परिसर कुनो नॅशनल पार्कच्या बफर झोनअंतर्गत येतो. आशाला देखील जेरबंद करुन पुन्हा कुनोत आणण्यासाठी वन विभागाच्या टीमकडून शर्थीचे प्रयत्न सुरु आहेत.
दरम्यान, पंतप्रधान नरेंद्र मोदी (PM Narendra Modi) यांच्या 72 व्या वाढदिवसानिमित्त नामिबियामधून (Namibia) 8 चित्त्यांना भारतात आणण्यात आले होते. नामिबियातून आणलेल्या आठ चित्त्यामध्ये 5 नर आणि 3 मादी चित्त्यांचा समावेश होता. मध्य प्रदेशच्या श्योपूर जिल्ह्यातील कुनो नॅशनल पार्कमध्ये पीएम मोदींनी या चित्त्यांना सोडले होते. काही दिवसांपूर्वीच एक मादी चित्ता साशाचा संसर्गामुळे मृत्यू झाला होता.
Edited By - Priya Vijay More
सकाळ+चे सदस्य व्हा
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.