Heartbreaking : विहिरीत पडलेला मोबाईल काढायला गेले, परत बाहेर आलेच नाहीत; ३ तरुणांचा दुर्दैवी मृत्यू

उत्तरप्रदेशमध्ये अंगावर काटा आणणारी घटना घडली आहे. मोबाईलच्या नादात तरुणांनी जीव गमावल्याच्या घटना अनेकदा ऐकायला मिळतात. मात्र फिरोजाबाद जिल्ह्यात विहिरीत पडलेला फोन काढण्यासाठी गेलेल्या तिघांचा गुदमरून मृत्यू झाला आहे. या विहिरीत विषारी वायू असल्याची माहिती समोर आली आहे. या घटनेचा पोलीस अधिक तपास करत आहेत.

उत्तरप्रदेशमधील फिरोजाबाद जिल्ह्यात मंगळवारी दुपारी १ च्या सुमारास ध्रुव (वर्षे २५) हा त्याचा चुलत भाऊ अजय (वर्षे २८) आणि मित्र चंद्रवीर यांच्यासोबत विहिरीजवळ बसला होता. अचानक ध्रुवचा फोन विहिरीत पडला. विहिरीत पडलेल्या फोनला बाहेर काढण्यासाठी ध्रुवने विहिरीत उडी मारली. बराच वेळ ध्रुव बाहेर न आल्याने त्याला वाचवण्यासाठी अजय आणि चंद्रवीर यांनी विहिरीत उडी मारली. तिघेही परत न आल्याने स्थानिकांनी पोलिसांत तक्रार केली.

पोलिसांनी घटनास्थळी धाव घेत अग्निशमन विभागाच्या मदतीने घटनास्थळी बचाव कार्य सुरू केले. ऑक्सिजन सिलिंडरच्या मदतीने पथकाने चार तासांच्या प्रयत्नांनंतर तिघांना बाहेर काढले, परंतु तोपर्यंत खूप उशीर झाला होता. तिघांनाही जिल्हा रुग्णालयात दाखल करण्यात आले. मात्र डॉक्टरांनी त्यांना मृत घोषित केले.

अतिरिक्त जिल्हा दंडाधिकारी यांनी दिलेल्या माहितीनुसार, ही विहीर एका कुटुंबाची वडिलोपार्जित मालमत्ता आहे. बराच काळ वापरात नसल्यामुळे या विहिरीत मिथेन वायू तयार झाला असावा, ज्यामुळे त्यांचा मृत्यू गुदमरून झाला आहे. या अपघाताने गावात भीतीचे वातावरण निर्माण झाले आहे.