Shocking : हृदयद्रावक! १० महिन्यांच्या चिमुकलीचा उकळत्या दुधात पडून मृत्यू

Rajasthan Bharatpur 10 Month Old Girl Chandani Dies राजस्थानमधील भरतपूरमधून एक काळीज पिळवटून टाकणारी घटना समोर आली आहे. भरतपूरच्या नादबाई पोलीस ठाण्याच्या हद्दीत उकळत्या दुधात पडून एका १० महिन्यांच्या चिमुकलीचा मृत्यू झाला. महत्त्वाची बाब म्हणजे ही घटना घडली तेव्हा मृत मुलीची आई घरीच होती. चिमुकलीच्या मृत्यूनंतर कुटुंबियांवर दुःखाचा डोंगर कोसळला असून पोलीस या घटनेबाबत अधिक तपास करत आहेत.

मिळालेल्या माहितीनुसार, ही घटना भरतपूरमधील नादबाई येथील बेहरामदा गावात घडली. या गावात राहणारे सत्यभान हे सकाळच्या सुमारास कामावर गेले होते, तर त्यांची पत्नी प्रीती आणि त्यांची १० महिन्यांची मुलगी चांदणी घरी होत्या. दुपारी १२ वाजण्याच्या सुमारास प्रीतीने दूध उकळून ते थंड होण्यासाठी खोलीतील पलंगाजवळ ठेवले. या वेळेस पलंगावर चांदणी तिच्या खेळण्यांसोबत खेळत होती.

खेळता खेळता चांदणीचा तोल जाऊन ती पलंगाशेजारी ठेवलेल्या उकळत्या दुधाच्या टोपात पडली. गरम दुधात पडल्याने तिला गंभीर दुखापत झाली. चांदणीच्या रडण्याने तिची आई धावत तिच्याजवळ आली. त्यावेळेस चिमुकली गंभीररीत्या भाजलेली होती.

कुटुंबीयांनी तिला तातडीने जवळच्या नादबाई रुग्णालयात दाखल करण्यात आले. मात्र, तिची प्रकृती खालावल्याने डॉक्टरांनी तिला भरतपूर येथील आरबीएम रुग्णालयात पाठवले, जिथे उपचारापूर्वी तिचा मृत्यू झाला. दरम्यान मुलीच्या मृत्यूने तिच्या कुटुंबियांवर दुःखाचा डोंगर कोसळला आहे.