Haryana Building collapsed: हरियाणात तीन मजली इमारत कोसळून 4 ठार, काही जण ढिगाऱ्याखाली अडकल्याची भीती

Haryana News: हरियाणातून मोठं वृत्त हाती आलं आहे. हरियाणात भात गिरणीची तीन मजली इमारत कोसळल्याची धक्कादायक घटना घडली आहे. या दुर्घटनेत चार जणांचा मृत्यू झाला आहे. तर २० जण जखमी झाले आहेत. या गिरणी इमारतीच्या ढिगाऱ्याखाली काही जण अडकल्याची भीती व्यक्त केली जात आहे. या घटनेने परिसरात एकच खळबळ उडाली आहे. (Latest Marathi News)

मिळालेल्या माहितीनुसार, हरियाणामधील करनालमध्ये मंगळवारी रात्री भात गिरणी कोसळल्याची घटना घडली. या घटनेत ४ जणांचा मृत्यू झाला असून २० जण जखमी झाले आहेत. घटनेची माहिती मिळताच पोलीस दल , अग्निशामक दल, पोलीस, रुग्णवाहिका घटनास्थळी पोहोचल्या आहेत. पोलीस आणि अग्निशामक दलाच्या जवानांनी मदत कार्य सुरू केलं आहे.

नेमकं काय घडलं?

हरियाणातील करनाल येथे ही तीन मजली भात गिरणी होती. शिव शक्ति भात गिरणी असे नाव आहे. या गिरणीत काही कामगार आराम करत होते. त्यावेळी ही दुर्घटना घडली आहे. या दुर्घटनेत 4 जणांचा मृ्त्यू झाला आहे. तर या इमारतीच्या ढिगाऱ्याखाली १०० हून अधिक लोकांना बाहेर काढल्याची माहिती हाती आली आहे.

पोलीस अधिकारी शंशाक कुमार यांनी सांगितले की, 'ही घटना दुर्दैवी आहे. या प्रकरणी कारवाई करण्यात येईल. आम्ही घटनास्थळी पोहोचत आहोत. या ठिकाणी डॉक्टर, एनडीआरएफ, एसडीआरएफची टीम देखील पोहोचली आहे. आतापर्यंत या दुर्घटनेत २० जण जखमी झाले असून तर ४ जणांचा मृत्यू झाला आहे. मलबा हटविण्याचं काम सुरू आहे'.