Haryana politics : विधानसभा निवडणुकीपूर्वी मोठा ट्विस्ट; हरियाणात काँग्रेस आणि 'आप'ची युती तुटली

नवी दिल्ली : दिल्लीनंतर आता हरियाणामध्येही काँग्रेस आणि आम आदमी पक्षाने युती तोडली आहे. हरियाणाचे माजी मुख्यमंत्री भूपिंदर सिंह हुड्डा यांनी मोठी घोषणा केली आहे. भूपिंदर यांनी हरियाणा विधानसभा निवडणूक काँग्रेस स्वबळावर निवडणूक लढणार असल्याचे जाहीर केले. विधानसभा निवडणुकीच्या मैदानात उतरण्याआधी काँग्रेसने जाहीर केलं.

हरियाणामध्ये काँग्रेस आणि आम आदमी पक्षाची युती तुटण्याचे काही दिवस आधीच संकेत मिळाले होते. काँग्रेस खासदार दीपेंद्र हुड्डा यांनी इंडिया आघाडीवर मोठं भाष्य केलं होतं. आम आदमी पक्षासोबतची युती लोकसभा निवडणुकीपर्यंत मर्यादित होती, असं वक्तव्य खासदार दीपेंद्र हुड्डा यांनी केलं होतं.

'हरियाणात विधानसभा निवडणूक काँग्रेस स्वबळावर लढण्यास सक्षम आहे. यामुळे हरियाणामध्ये काँग्रेस स्वबळावर निवडणूक लढणार आहे. आम्हाला हरियाणाला वाचवायचं आहे. त्याचा विकास करायचा आहे, असं वक्तव्य खासदार हुड्डा यांनी केलं.

९० विधानसभा मतदारसंघ असलेल्या हरियाणा विधानसभेची निवडणूक सप्टेंबर-ऑक्टोबरमध्ये होण्याची शक्यता आहे. हरियाणा विधानसभेचा कार्यकाळ ३ नोव्हेंबर २०२४ रोज संपणार आहे. हरियाणामध्ये मागील १० वर्षात भाजपचं सरकार आहे.

हरियाणामध्ये मागील दोन टर्म भाजप सरकार

लोकसभा निवडणुकीत हरियाणातील १० लोकसभा मतदारसंघापैकी ५ भाजप आणि ५ काँग्रेसने जिंकल्या. त्यामुळे हरियाणातील विधानसभा निवडणुकीत राजकीय पक्षांमध्ये काटे की टक्कर होण्याची शक्यता आहे. तर लोकसभा निवडणुकीपूर्वी भाजपने जेजेपीशी युती तोडली होती. त्यानंतर दोन्ही पक्षांनी स्वबळावर निवडणूक लढली. हरियाणात भाजपने मनोहरलाल खट्टर यांच्या ऐवजी मुख्यमंत्रिपदाच्या खुर्चीवर नायब सिंह सैनी यांना बसवलं. तर मनोहरलाल खट्टर यांना पंतप्रधान नरेंद्र मोदी यांच्या मंत्रिमंडळात स्थान मिळालं आहे.