Accident News : दरड कोसळून ७ कामगारांचा मृत्यू, अजूनही काहीजण अडकल्याची भीती

गुजरातच्या मेहसाणामध्ये भीषण दुर्घटना घडली आहे. दरड कोसळून ७ कामगारांचा मृत्यू झाला असून अजूनही काही कामगार मलब्यात अडकल्याची भीती व्यक्त होत आहे. काही अडकलेल्या मजुरांना बाहेर काढण्याचे काम सुरू आहे. जासलपूरनजीक ही घटना घडली आहे.

घटनास्थळावरून मिळालेल्या माहितीनुसार, मेहसाणा जिल्ह्यातील कडी तालुक्यातील जासलपूरनजीक एका बांधकाम सुरू असलेल्या कंपनीची भिंत बांधताना अचानक दरड कोसळली. तिथे काम करत असलेले अनेक कामगार या दरडीखाली अडकले. त्यात ७ जणांचा मृत्यू झाल्याची प्राथमिक माहिती आहे. अजूनही काही कामगार मलब्यात अडकले आहेत. त्यांना बाहेर काढण्याचं काम युद्ध पातळीवर सुरू आहे. घटनास्थळी ॲम्ब्युलन्स आणि पोलिस अधिकारीही पोहोचले आहेत.

जिल्हा विकास अधिकारी डॉ. हसरत जस्मीन यांनी सांगितलं की हा अपघात आज दुपारी अंदाजे 1:45 वाजता झाला. एका खासगी कंपनीचे बांधकाम सुरू होते. आमच्याकडे असलेल्या माहितीनुसार 9-10 लोक अडकले होते, त्यापैकी ७ जणांचे मृतदेह सापडले आहेत. तर 19 वर्षीय तरुणाला जिवंत बाहेर काढण्यात यश आलं आहे. अजूनही 2-3 लोक अडकलेले आहेत. जेसीबीच्या सहाय्याने त्यांना मातीचा ढिगारा हटवून त्यांना बाहेर काढण्याचं काम सुरू आहे.