Assam News : Google maps चा वापर अन् पोलिसांना खावा लागला मार, नेमकं प्रकरण काय?

Google Maps Mistakes : गुगल मॅप्सचा वापर करताना नेहमी आजूबाजूला पाहणे आवश्यक असते. याचा वापर फायदेशीर असला तरीही ते १००% अचूक नसते. गुगल मॅप्स वापरल्याने रस्ता चुकलो असं आपल्या सर्वांसोबत एकदातरी झाले असेलच. असाच प्रकार आसाम पोलिसांसोबत झाला आहे. आसामच्या पोलिसांनी गुगल मॅपचा वापर केला आणि ते राज्याच्या सीमा ओलांडून नागालँडमध्ये घुसले.

आसामच्या जोरहाट जिल्ह्यातील पोलिसांची टीम एका आरोपीला पकडण्यासाठी निघाली होती. या टीममध्ये १५ ते १६ पोलीस अधिकारी होते. त्यातील तीन जण गणवेशात होते. रात्रीच्या वेळी प्रवास करताना पोलिसांनी गुगल मॅपचा वापर करायला सुरुवात केली. पुढे प्रवास करताना त्यांनी आसामची सीमा ओलांडली. त्यांनी नागालँडच्या सीमेमध्ये प्रवेश केला. दरम्यान गुगल मॅपवर ते अजूनही आसाममध्ये असल्याचे दाखवत होते.

पोलिसांची टीम रात्री नागालँडमध्ये पोहोचली. ते गणवेशात नव्हते, शिवाय त्यांच्याकडे अत्याधुनिक हत्यार देखील होते. तेव्हा स्थानिकांना त्यांच्यावर संशय आला. हे लोक बदमाश आहेत असा समज स्थानिक नागरिकांना झाला. त्यांनी पोलिसांना पकडून ठेवले. यात एक पोलीस कर्मचारी जखमी देखील झाला. रात्रभर आसाम पोलिसांना डाबवून ठेवण्यात आले.

स्थिती बिघडत असल्याचे पाहून आसाम पोलिसांनी नागालँडच्या स्थानिक पोलीस अधिकाऱ्यांना संपर्क केला. त्यांनी नागालँड पोलिसांना सर्व प्रकार समजवला. त्यानंतर नागालँड पोलिसांनी एक टीम घटनास्थळी पाठवली. त्यानंतर त्यांनी स्थानिक नागरिकांशी संवाद साधला आणि आसाम पोलिसांची सुटका केली. हा सर्व प्रकार गुगल मॅप वापरल्यामुळे झाला.