Gandee Aurat News: 'गंदी महिला'म्हटल्यानं प्रतिष्ठेला धक्का पोहचत नाही; दिल्ली हायकोर्टाने खटलाच निकाली काढला

Delhi High Court:

महिलांवरील अन्याय अत्याचाराच्या अनेक घटना सातत्याने समोर येत आहेत. अशात विनयभंगातील एका केसमध्ये दिल्ली हायकोर्टाने विशेष टिप्पणी नोंदवली आहे. महिलेचा 'गंदी औरत' असा उल्लेख केल्यास त्यावर याचिका दाखल होऊ शकत नाही. यामध्ये महिलेचा अपमान करणे किंवा तिच्या प्रतिष्ठेला ठेच पोहवण्यासारखे काहीच नाही, असं कोर्टाने स्पष्ट केलं आहे. (Latest Crime News)

एका पुरुषाने महिलेला गंदी महिला असं म्हटलं होतं. त्यावर महिलेने न्यायालयात खटला चालवण्यासाठी याचिका दाखल केली होती. महिलेची ही याचिका दिल्ली हायकोर्टाने फेटाळली आहे.

न्यायमूर्ती स्वर्णकांता शर्मा यांच्या खंडपीठाने यावर म्हटलं आहे की, न्यायालयीन निकाल देताना कोणताही भेदभाव केला जात नाही. यामध्ये लिंग समानता देखील मानली जाते. त्यामुळे गंदी महिला म्हटल्याने त्या व्यक्तीने असभ्य वर्तन केल्यासारखे दिसत नाही.

नेमकं प्रकण काय?

फिर्यादी महिला आणि पुरुष हे दोघेही एकाच कंपनीत काम करतात. महिलेने त्या व्यक्तीला १००० रुपये देण्यास नकार दिला होता. त्यामुळे त्याने तिला तू गंदी महिला आहेस असं म्हटलं. यावरुन महिलेने आरोपी विरोधात गुन्हा दाखल करण्यासाठी कोर्टात धाव घेतली. मात्र हा शब्द कलम ५०९ मध्ये बसत नसल्याचं कोर्टाने म्हटलंय.