Election Commission press conference : निवडणूक आयोगाची उद्या पत्रकार परिषद, मोठी घोषणा होणार की आणखी काही...

केंद्रीय निवडणूक आयोगाची उद्या रविवारी दुपारी तीन वाजता दिल्लीत महत्वाची पत्रकार परिषद होत आहे. निवडणूक आयोगाचे डायरेक्टर जनरल (मीडिया) यांच्याकडून ही माहिती देण्यात आली. आगामी निवडणुकांसंबंधी घोषणा होण्याची शक्यता व्यक्त केली जात आहे. तसेच एसआयआर आणि राहुल गांधी यांनी केलेल्या मतचोरीच्या आरोपांना उत्तरे देण्याची शक्यता आहे.

काँग्रेस आणि राष्ट्रीय जनता दलाच्या वतीने बिहारमध्ये 'व्होट अधिकार' यात्रा सुरू करण्यात येणार आहे. ६ दिवस ही यात्रा काढणार आहेत. १३०० किलोमीटरची ही यात्रा जवळपास २५ जिल्ह्यांतून जाणार आहे. या यात्रेत इंडिया आघाडीतील सर्व प्रमुख पक्षांचे वरिष्ठ नेते आणि कार्यकर्ते सहभागी होणार आहेत. तेजस्वी यादव देखील या यात्रेत सहभागी होणार आहेत. त्याचवेळी निवडणूक आयोगाकडून उद्याच महत्वाची पत्रकार परिषद घेतली जाणार आहे. त्यामुळे आयोगाच्या या पत्रकार परिषदेला महत्व प्राप्त झाले आहे.

मतचोरीच्या आरोपांना उत्तर?

राहुल गांधी यांनी काही दिवसांपूर्वी निवडणूक आयोगावर मतचोरीचा आरोप केला होता. या आरोपांनंतर देशातलं राजकारण ढवळून निघालं होतं. आता या आरोपांना निवडणूक आयोग उत्तरे देण्याची शक्यता व्यक्त केली जात आहे. काँग्रेस आणि राहुल गांधी यांच्यासह विरोधी पक्षांच्या नेत्यांकडून मतदारयाद्यांमधील घोळ आणि मतचोरीचा आरोप करून निवडणूक आयोगाच्या निष्पक्षतेवर प्रश्नचिन्ह उपस्थित केले होते. त्यामुळे निवडणूक आयोगाच्या या पत्रकार परिषदेला अधिक महत्व प्राप्त झाले आहे.

मतचोरीच्या आरोपांचं सत्र सुरूच

गेल्या काही महिन्यांपासून, विशेषतः २०२४ मधील लोकसभा निवडणूक आणि त्यानंतर झालेल्या विधानसभा निवडणुकांनंतर विरोधी पक्षांनी मतदारयाद्यांमध्ये कथितरित्या घोळ झाल्याचा आरोप केला. काँग्रेस नेते राहुल गांधी यांनी ७ ऑगस्टला नवी दिल्लीत पत्रकार परिषद घेऊन कर्नाटकातील बेंगळुरू मध्य लोकसभा मतदारसंघातील महादेवपुरा विधानसभा मतदारसंघाचा हवाला देताना जवळपास एक लाखांहून अधिक मतांची चोरी झाल्याचा दावा केला होता.

मतदारयाद्यांमध्ये बोगस मतदार, बनावट पत्ते, एकाच पत्त्यावर शेकडो मतदारांची नावे अशा प्रकारचे अनेक आरोप करण्यात आले. जर हा घोळ झाला नसता तर कदाचित कर्नाटकात काँग्रेस १६ जागांवर विजयी झाला असता, असा दावा करण्यात आला.