Cylinder Blast : जेवण बनवताना गॅस सिलिंडरचा स्फोट, ३ घरं कोसळली, लहान मुलासह चौघांचा मृत्यू

Cylinder Blast Death Toll : उत्तर प्रदेशातील फतेहपूरमध्ये एका घरात जेवण बनवताना अचानक गॅस सिलिंडरचा भीषण स्फोट झाल्याची धक्कादायक घटना घडली आहे. हा स्फोट इतका तीव्र भयंकर होता की, बाजूची ३ घरेही जमिनीदोस्त झाली. या दुर्दैवी अपघातात एका चिमुकल्यासह चौघांचा जागीच मृत्यू झाला आहे. या दुर्घटनेत काही जण गंभीर जखमी झाले आहेत. स्फोटाच्या मोठ्या आवाजाने परिसरात भीतीचे वातावरण पसरले आहे. ढिगाऱ्याखाली आणखी काही लोक अडकल्याची भीती व्यक्त केली जात आहे. दुर्घटनेनंतर पोलीस आणि बचाव पथकाकडून मदतकार्य सुरू आहे.

सोमवारी संध्याकाळी घरात जेवण बनवताना अचानाक गॅस सिलिंडरचा भयानक स्फोट झाला. हा स्फोट इतका भीषण आणि तीव्र होता की, परिसरात मोठा आवाज झालाच. पण बाजूची ३ घरेही जमिनीदोस्त झाली. या दुर्घटनेत चिमुकल्यासह चार जणांचा मृत्यू झाला असून, तीन जण गंभीर जखमी झाले आहेत. जखमींना उपचारासाठी जवळच्या रूग्णालयात दाखल करण्यात आले आहे. ढिगाऱ्याखाली आणखी काही लोक दबले असण्याची शक्यता असल्याने शोधमोहीम सुरूच होती. जिल्हाधिकारी आणि पोलीस अधीक्षक स्वतः घटनास्थळी उपस्थित राहून बचावकार्यावर लक्ष ठेवून आहेत.

नेमकं काय घडलं?

मिळालेल्या माहितीनुसार, मालवणमध्ये राहणारे सुरेश गुप्ता घरात स्वयंपाक करत होते. त्यावेळी अचानक गॅस सिलिंडरचा जोरदार स्फोट झाला. स्फोट इतका भयंकर होता की, सुरेश यांच्या घरासोबतच शेजारी असलेली आणखी दोन घरे पूर्णपणे कोसळली. या अचानक झालेल्या दुर्घटनेने परिसरात मोठी घबराट आणि पळापळ झाली.

रात्री उशिरापर्यंत बचावकार्य सुरू

दुर्घटनेची माहिती मिळताच पोलीस, अग्निशमन दल आणि प्रशासकीय पथकांनी तातडीने घटनास्थळी धाव घेतली. स्थानिकांच्या मदतीने ढिगाऱ्याखाली अडकलेल्या लोकांना बाहेर काढण्यासाठी बचावकार्य सुरू करण्यात आले. ढिगाऱ्याखालून आतापर्यंत सात जणांना बाहेर काढण्यात यश आले आहे. जखमींना तातडीने वैद्यकीय महाविद्यालयात दाखल करण्यात आले; मात्र उपचारादरम्यान एका लहान बाळासह चौघांनी प्राण गमवाले. उर्वरित तिघांवर रुग्णालयात उपचार सुरू असून, त्यापैकी एकाची प्रकृती अत्यंत गंभीर आहे.