Crime News: बॉक्सर मेरी कोमच्या घरी चोरी, ३ अल्पवयीन मुलांना अटक; चोरीस गेलेल्या वस्तू जप्त

बॉक्सिंग वर्ल्ड चॅम्पियन एमसी मेरी कोमच्या फरीदाबादमधील सेक्टर ४६ येथील घरात सहा वेळा झालेल्या चोरीचा पर्दाफाश पोलिसांनी अवघ्या २४ तासांत केला आहे. एनआयटी गुन्हे अन्वेषण शाखेच्या पथकाने कारवाई करत चोरीमध्ये सहभागी असलेल्या तीन अल्पवयीन मुलांना अटक केली असून त्यांच्याकडून चोरीस गेलेला माल जप्त करण्यात आला आहे.

मिळालेल्या माहितीनुसार, पोलिसांनी माहिती देणाऱ्याच्या मदतीने आणि सीसीटीव्ही कॅमेरा पाहून लेझर व्हॅली पार्कजवळ तिघांना पकडले. चौकशीदरम्यान त्यांनी कबुली दिली की त्यांचे आणखी ३-४ साथीदारही या गुन्ह्यात सामील होते. २३-२४ सप्टेंबरच्या मध्यरात्री रिकाम्या घरांचा शोध घेत ते फिरत होते आणि त्यावेळी मेरी कोमच्या घरात शिरले. घरात प्रवेश करून त्यांनी तीन एलईडी टीव्ही, मनगटी घड्याळ, चष्मा, ब्रीफकेस, बूट, कपडे, सँडल, परफ्यूम, ट्रिमर, लॅपटॉप चार्जर आणि बेल्ट यासारख्या वस्तू चोरल्या. पोलीस चौकशीनंतर चोरीस गेलेल्या वस्तू ताब्यात घेण्यात आल्या.

अल्पवयीन आरोपींनी उघड केले की ते वारंवार अशा प्रकारचे गुन्हे करतात. जेथे संधी मिळते आणि वस्तू सापडतात तेथे चोरी करून माल विकतात आणि मिळालेला पैसा खाणे-पिणे व मौजमजेत खर्च करतात. पोलिसांच्या माहितीनुसार या मुलांचा एक मित्र आहे ज्याच्या सल्ल्याने त्यांनी या चोरीचा डाव आखला. त्याचा शोध लागल्यानंतर या प्रकरणाच्या तपासात आणखी गोष्टी स्पष्ट होण्याची शक्यता वर्तवली जात आहे. सध्या पोलीस उर्वरित साथीदारांच्या शोधात आहेत.

या चोरीचा उलगडा सीसीटीव्हीच्या मदतीने झाला. शनिवारी मेरी कोमच्या शेजाऱ्यांनी त्यांच्या घराबाहेरील कॅमेऱ्यात संशयास्पद हालचाली पाहिल्या. त्यानंतर त्यांनी त्वरित पोलिसांना कळवले तसेच मेरी कोमलाही माहिती दिली. मेरी कोम दिल्लीतील आपल्या प्रशिक्षक शांती कुमार लेखुराम यांच्या माध्यमातून पोलिसांकडे तक्रार नोंदवली. तक्रार आल्यानंतर पोलिस आयुक्त सतेंद्र कुमार गुप्ता यांनी हा तपास गुन्हे अन्वेषण शाखेकडे सोपवला. पोलीस प्रवक्ते यशपाल यांनी सांगितले की अल्पवयीन मुलांचे उर्वरित साथीदार लवकरच अटकेत घेतले जातील.

मेरी कोम सध्या मेघालयात अ‍ॅथलेटिक्स स्पर्धेत सहभाग घेत असल्यामुळे घरी येऊ शकणार नाही. दरम्यान, तिचा भाऊ मंगळवारी फरीदाबादला पोहोचण्याची अपेक्षा आहे. तो बहिणीच्या घरात झालेल्या चोरीबाबत आणि जप्त केलेल्या वस्तूंबाबत पोलिसांकडून माहिती घेईल. मेरी कोम गेल्या सुमारे अडीच ते तीन वर्षांपासून सेक्टर ४६ मध्ये वास्तव्यास आहे. ३ मार्च २०२४ रोजी तिने जिल्हा प्रशासन आयोजित हाफ मॅरेथॉनमध्ये सहभाग घेतला होता. या चोरीच्या घटनेमुळे परिसरात सुरक्षेबाबत चिंतेचे वातावरण निर्माण झाले आहे.