Kabul Blast: अफगानिस्तान हादरलं! राजधानीमधील हॉटेलमध्ये मोठा स्फोट, अनेक लोकांचा मृत्यू

अफगाणिस्तानची राजधानी काबूलमधील शहर-ए-नव परिसरातील एका हॉटेलमध्ये एक भीषण स्फोट झालाय. या स्फोटात अनेकांचा जीव गेला असून अनेकजण जखमी झालेत. या स्फोटाच्या वृत्ताला तालिबानच्या गृह मंत्रालयाने दुजोरा दिलाय. स्फोट ज्या हॉटेलमध्ये झाला त्या हॉटेलमध्ये परदेशी नागरिक मोठ्या प्रमाणात राहतात. विशेष म्हणजे स्फोट झालेलं ठिकाण हे काबूलमधील सर्वात सुरक्षित क्षेत्रांपैकी एक मानले जाते. शहर-ए-नौ जिल्ह्यातील एका हॉटेलमध्ये स्फोट झाल्याची माहिती प्रवक्ते खालिद जादरान यांनी दिलीय.

गृह मंत्रालयाचे प्रवक्ते अब्दुल मतीन कानी म्हणाले की, या स्फोटात अनेक लोकांचा मृत्यू झाला आहे तर काही जण जखमी झाले आहेत. मृतांची संख्या नेमकी किती आहे, आणि कशामुळे स्फोट झाला याचा तपास केला जात आहे. तसेच अधिकाऱ्यांनी सांगितले की, त्यांच्याकडे अद्याप मृतांच्या नेमक्या संख्येबद्दल सविस्तर माहिती नाहीये. अधिक माहिती उपलब्ध झाल्यानंतरच ते योग्य माहिती देऊ शकतील.

वृत्तानुसार, तेथे असलेल्या लोकांनी स्फोटाचा आवाज ऐकला आणि घटनास्थळावरून धूर निघताना दिसला. स्फोटामुळे आजूबाजूच्या परिसरात चेंगराचेंगरी झाली. लोकं सैरवैर पळू लागले. अधिकाऱ्यांनी सांगितले की, स्फोटाची माहिती मिळताच सुरक्षा दलांनी परिसरात नाकाबंदी केली आहे. तपास यंत्रणा स्फोट कशामुळे झाला याचा शोध घेत आहेत. या घटनेत कोण सामील होते हे अद्याप निश्चित झालेले नाही, परंतु या स्फोटात इस्लामिक स्टेट-खोरासान (ISIS-K) चा हात असण्याची शक्यता आहे.