200 year Old Condom : मेंढ्याच्या आतड्याने बनलेला अन् २०० वर्षे जुना 'लक्झरी कंडोम' अचानक चर्चेत; काय आहे खासियत?

मेंढ्याच्या आतड्यांपासून बनवलेला २०० वर्षांपूर्वीचा कंडोम सध्या प्रचंड चर्चेत आला आहे. नेदरलँडमधील संग्रहालयात प्रदर्शित करण्यात आलेला हा दुर्मीळ कंडोम नन आणि पाद्रींच्या कामुक नक्षीकामांसह सादर करण्यात आला आहे. हा कंडोम गर्भनिरोधक इतिहासातील एक महत्त्वाचा आणि दुर्मीळ नमुना मानला जातो. या संग्रहालयात इतिहास, कला आणि लैंगिक शिक्षणाचा अनोखा संगम पाहायला मिळतो. येथे लोकांना लैंगिक इतिहास, समाजाची नैतिकता आणि कलेचा सामाजिक प्रभाव समजून घेण्याची संधी मिळते.

वॉशिंग्टन पोस्टच्या रिपोर्टनुसार, हा कंडोम इसवी सन 1830 च्या सुमारास तयार करण्यात आला आहे. तो पॅरिसमधील एका उच्चभ्रू वेश्यालयातून आणला गेला असल्याचे मानले जाते. यावर एका नग्न नन आणि तीन पाद्रींचे कामुक नक्षीकाम करण्यात आले आहे. यामुळे हा कंडोम केवळ गर्भनिरोधक नसून, एक व्यंग्यात्मक कलाकृती देखील ठरतो.

मिळालेल्या माहितीनुसार, हा २० सेंटीमीटर लांब कंडोम हार्लेममधील एका लिलावात विकत घेण्यात आला होता. गेल्या नोव्हेंबरमध्ये, तो सुमारे ९०,००० ते ९२,००० भारतीय रुपयांमध्ये खरेदी करण्यात आला. सध्या तो काचेत बंद ठेवण्यात आला आहे. हा कंडोम संपूर्ण प्रदर्शनाचे मुख्य आकर्षण केंद्र ठरला आहे. या प्रदर्शनात डच आणि फ्रेंच कलाकारांच्या लैंगिक आरोग्य व कामुकतेशी संबंधित चित्रे आणि छायाचित्रे देखील सामील आहेत.

इसवी सन 1839 मध्ये वल्कनाइज्ड रबरचा शोध लागण्यापूर्वी, कंडोम तयार करणे ही एक प्रकारची हस्तकला मानली जात होती. त्या काळात प्राण्यांच्या झिल्ली, लिनन आणि अगदी कासवाच्या कवचाचा सुद्धा गर्भनिरोधक म्हणून वापर केला जायचा. याचा उपयोग लैंगिक रोगांपासून संरक्षण मिळवण्यासाठी आणि गर्भधारणा टाळण्यासाठी केला जात असे.