कल्पिता पिंपळे यांच्यावरील हल्ल्याच्या निषेधार्थ इंदापूरात कामबंद आंदोलन

बारामती : ठाणे महानगरपालिकेच्या सहाय्यक आयुक्त कल्पिता पिंपळे या कर्तव्य बजावत असताना एका फेरीवाल्याकडून त्यांच्यावर हल्ला झाला होता. यात त्या जखमी होऊन त्यांची दोन बोटं कापली गेली. या कृत्याचा निषेध म्हणून पुणे जिल्ह्यातील इंदापूर नगरपरिषदेच्या कर्मचाऱ्यांनी आज दिवसभर कामबंद आंदोलन करून या घटनेचा निषेध नोंदवला आहे. (Work stoppage agitation in Indapur to protest the attack on Kalpita Pimple)

हे देखील पहा -

यावेळी कामगार एकजुटीचा विजय असो, हल्ल्याचा निषेध असो अशा घोषणाही देण्यात आल्या. एका महिला अधिकाऱ्यावर झालेला हा भ्याड हल्ला अत्यंत संतापजनक असून त्यासाठी निषेध म्हणून एक दिवस काम बंद आंदोलन केले असल्याचे प्रशासकीय अधिकारी वर्षा क्षीरसागर यांनी सांगितले. गुन्हेगारी प्रवृत्तीचे लोक जेव्हा कर्तव्य बजावणाऱ्या अधिकार्‍यांवर हल्ले करतात तेव्हा अशा प्रकारच्या भ्याड हल्ल्याने केवळ हल्ला झालेला अधिकारीच नव्हे तर संपूर्ण प्रशासनाचे मनोधैर्य खच्चीकरण होते.

त्यामुळे अशा हल्लेखोरांवर कठोर कारवाई करणे हाच यावरील उपाय आहे, असे हल्ले आम्ही खपवून घेणार नाही अशी प्रतिक्रिया नगर परिषद कर्मचारी संघटनेचे अध्यक्ष मोहन शिंदे यांनी दिली आहे. यावेळी अनेक कर्मचारी उपस्थित होते.

Edited By - Akshay Baisane