Amit Thackeray: अमित ठाकरेंना भाजपचा पाठिंबा, माहीममधून सरवणकर माघार घेणार? BJP च्या भूमिकेने शिंदेंची कोंडी?

भरत मोहोळकर, साम टीव्ही, प्रतिनिधी

विधानसभा निवडणुकीचं बिगूल वाजलंय. त्यातच राज ठाकरेंचा मुलगा अमित ठाकरे माहीममधून निवडणूकीच्या रिंगणात उतरले आहेत. शिंदे गटाने सदा सरवणकरांना उमेदवारी दिलीय. तर ठाकरेंनी प्रभादेवी-दादरमधला आपला हुकमी एक्का महेश सावंतांना मैदानात उतरवलंय. त्यामुळे माहीमची निवडणूक चुरशीची होणार, हे स्पष्ट झालं असतानाच माहीममध्ये मोठा ट्विस्ट निर्माण झालाय.

अमित ठाकरेंच्या उमेदवारीला पाठींबा देण्याची भूमिका भाजपने घेतलीय. तर सरवणकरांबाबतचा निर्णय एकनाथ शिंदे घेतील, असं म्हणत उदय सामंतांनी सावध भुमिका घेतलीय. 'अमित यांना पाठिंबा देण्यास काय हरकत?', असं भाजप नेते आशिष शेलार म्हणाले आहेत. तर याचसंदर्भात बोलताना उदय सामंत म्हणाले की, सरवणकरांनी पडत्या काळात साथ दिली.'

भाजपने अमित ठाकरेंना पाठींबा देण्याची भूमिका मांडताच एकनाथ शिंदेंचे निकटवर्तीय दीपक केसरकरांनी थेट राज ठाकरेंची भेट घेतली. त्यामुळे चर्चांना उधाण आलंय. मात्र अमित ठाकरेंना पाठींबा देण्याच्या भाजपच्या भुमिकेचा राजकीय अर्थ काय? हे जाणून घेऊ

भाजपचा ठाकरेंना पाठींबा का?

• लोकसभा निवडणूकीतील बिनशर्त पाठींब्याची परतफेड करण्याचा प्रयत्न.

• अमित ठाकरेंना पाठींबा देऊन उद्धव ठाकरेंना संकुचित ठरवण्याचा प्रयत्न.

• हिंदुत्व आणि ठाकरे कुटुंबासाठी तत्पर असल्याचं चित्र निर्माण करण्याचा प्रयत्न.

मात्र निवडणुकीतून माघार घेणार नसल्याचं सदा सरवणकरांच्या मुलानं स्पष्ट केलंय. त्यामुळे हा या जागेवरून महायुतीत वाद होण्याची शक्यता आहे.

लोकसभा निवडणूकीत राज ठाकरेंनी महायुतीला बिनशर्त पाठींबा देत पुणे, ठाणे, सिंधुदूर्ग आणि मुंबईत सभा घेऊन प्रचारही केला. त्याची परतफेड करण्यासाठी भाजपने अमित ठाकरेंना पाठींबा देण्याचा निर्णय घेतला असला तरी बंडानंतर शिंदेंना साथ देणाऱ्या सदा सरवणकर यांच्या उमेदवारीचं काय? असा नवा प्रश्न निर्माण झालाय. त्यामुळे माहीमच्या मैदानात तिरंगी लढत होणार की सदा सरवणकरांची मनधरणी केली जाणार? याकडे लक्ष लागलंय.