मुंबई: मध्य रेल्वेच्या प्रवाशांसाठी एक आनंदाची बातमी आहे. मध्य रेल्वेने प्रवास करणाऱ्या प्रवाशांना आता प्रवासात कंटाळा येणार नाही. त्याचं कारण म्हणजे रेल्वेने आता प्रवाशांच्या मनोरंजनाची (Entertainment) पुरेपूर काळजी घेतली आहे. मध्य रेल्वेच्या मुंबई विभागीय मंडळातर्फे आजपासून मुंबई लोकलमध्ये (Mumbai Local) कंटेंट ऑन डिमांड (Content On Demand) ही सेवा सुरू करण्यात आली आहे. यामुळे लोकल प्रवासादरम्यान आपल्या मोबाईलवर चित्रपट पाहणं, विविध शोज् पाहणं, शॉपिंग करणं हे शक्य होणार आहे, तेही विना इंटरनेट, आणि अगदी मोफत!
हे देखील पहा -
होय हे खरं आहे... आपल्याकडे इंटरनेटचा रिचार्ज नसेल, मोबाईलला नेटवर्क नसेल तरीही आपण Content Conjunction करु शकतो. मध्य रेल्वेच्या मुंबई विभागीय मंडळ आणि शुगरबॉक्स नेटवर्क्स यांच्या संयुक्त विद्यमाने इन-ट्रान्झिट तंत्रज्ञानाद्वारे हे शक्य झालं आहे. प्रवासी आता आता त्यांच्या प्रवासात डिजिटल सेवांचा अखंड लाभ घेऊ शकतात. मुंबई विभागीय मंडळ (Central Railway Mumbai Division) आणि शुगरबॉक्स नेटवर्क्स (SugarBox Networks) यांच्या संयुक्त विद्यमाने सुरु झालेली ही सेवा जगातील पहिली हायपरलोकल एज क्लाउड प्लॅटफॉर्म सेवा आहे.
प्रवाशांना ही सेवा वापरण्यासाठी त्यांच्या मोबाईलमध्ये शुगरबॉक्स हे ॲप डाऊनलोड करावे लागेल. त्यानंतर मोबाईलचा वायफाय (WiFi) चालू करुन नेटवर्कला कनेक्ट केल्यानंतर या ॲपमधील डिजिटल सेवांचा लाभ घेता येईल. या सुविधेचा शुभारंभ आज मुंबईतील छत्रपती शिवाजी महाराज टर्मिनल (CSTM) या रेल्वे स्थानकावर करण्यात आला. याप्रसंगी मध्य रेल्वेचे महाव्यवस्थापक अनिल कुमार लाहोटी, शुगरबॉक्स नेटवर्कचे सह-संस्थापक रोहित परांजपे, रिपुंजय बररिया आणि देवांग गोराडिया तसेच मुंबई विभागाचे डीआरएम शालभ गोयल, आणि इतर सहकारी यावेळी उपस्थित होते.
या सुविधेचे फायदे काय?
१) लोकलमध्ये डिजिटल सेवा वापरता येणार (मुव्हीज्, शोज्, ऑनलाईन पेमेंट इत्यादी)
२) मोबाईलमध्ये रिचार्ज नसेल किंवा नेटवर्क नसेल तरीही डिजिटल सेवा वापरता येणार
३) प्रवासादरम्यान करमणूक
४) पुर्णपणे मोफत सेवा
ही सुविधा कशी वापराल?
१) सर्वप्रथम गुगल प्ले स्टोअरवरुन शुगरबॉक्स हे ॲप डाऊनलोड आणि इंस्टॉल करावे.
२) ॲपला लोकेशनची परवानगी द्यावी.
३) आपला १० अंकी मोबाईल क्रमांक टाकावा, त्यानंतर ओटीपी आपल्याला एसएमएसद्वारे मिळेल, तो टाकून व्हेरिफिकेशन पुर्ण करावे.
४) आता आपले वायवाय चालू करुन शुगरबॉक्स या नेटवर्कला कनेक्ट करावे.
५) वायफाय शुगरबॉक्स नेटवर्कला कनेक्ट झाल्यानंतर या सेवेचा लाभ घेता येईल, मात्र केवळ शुगरबॉक्स ॲपमधील कंटेंट पाहता येईल बाकी पुर्ण इंटरनेट वापरता येणार नाही.
ही सुविधा कुठे-कुठे मिळेल?
सुरूवातीला मेन लाईन वरील 10 लोकलमध्ये ही सोय उपलब्ध करून दिली जाणार आहे. उर्वरित 155 लोकलमध्ये टप्प्या-टप्प्याने ती उपलब्ध करून दिली जाईल. ट्रेनमध्ये सर्व्हिस प्रोव्हायडरद्वारा वायफाय नेटवर्क उपलब्ध करून दिले जाणार आहेत. त्यामध्ये पहिल्यांदा मेन लाईन वर सीएसटीएम-कल्याण/ कर्जत/ कसारा मार्गावरील लोकलवर ही सोय मिळेल.
शुगरबॉक्स नेटवर्क बद्दल
शुगरबॉक्स नेटवर्क्स हे जगातील पहिले हायपरलोकल एज क्लाउड प्लॅटफॉर्म आहे जे वापरकर्ते, नेटवर्क (ISPS, इंटरनेट इन्फ्रा प्रदाते, इ.) आणि डिजिटल सेवा (अ‍ॅप्स, वेबसाइट्स इ.) यांना लोकल एरिया नेटवर्क्सचा उपयोग करण्यासाठी सक्षम करते. या तंत्रज्ञानाला सर्वसामान्यांसाठी इंटरनेट सुलभ, परवडणारे आणि विश्वासार्ह बनवण्यासाठी, कंपनी कनेक्टिव्हिटीची पुनर्कल्पना करत आहे. 2016 मध्ये रोहित परांजपे, रिपुंजय बरारिया आणि देवांग गोराडिया यांनी एकत्र येत शुगरबॉक्स नेटवर्कची स्थापना केली.
Edited By - Akshay Baisane
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.