मुंबई : वरळीत जांभोरी मैदानातील बांधकामावरून राजकीय वातावरण तापलं आहे. या बांधकामाच्या विरोधात मनसेने आक्रमक भूमिका घेतली. वरळीतील या बांधकामावरून मनसे आणि ठाकरे गटाचे कार्यकर्ते आमनेसामने आले. त्यानंतर ठाकरे गट आणि मनसे कार्यकर्त्यांमध्ये जोरदार राडा झाला. दोन्ही पक्षाच्या कार्यकर्त्यांनी एकमेकांची कॉलर धरली. दोन्ही कार्यकर्त्यांच्या बाचाबाचीचा व्हिडिओ समोर आला आहे.
आगामी विधानसभा निवडणुकीच्या पार्श्वभूमीवर वरळीत राजकीय घडामोडींना वेग आला आहे. वरळीत ठाकरे गट आणि मनसेचे पदाधिकारी सक्रिय झाले आहेत. वरळीतील जांबोरी मैदानात आमदार निधीतून उभारण्यात आलेल्या एका खोलीला मनसे कार्यकर्त्यांनी विरोध दर्शवला आहे. या बांधकामाच्या विरोधात मनसेने विरोध दर्शवत आक्रमक भूमिका घेतली आहे.
मैदानाच्या बाहेर बांधकाम करा, मैदान हे मुलांसाठी आहे, अशी भूमिका मनसेची आहे. याच मैदानाच्या मुद्द्यावरून मनसे आक्रमक झाली आहे. जांभोरी मैदान येथे करण्यात आलेल्या आमदार निधीतील बांधकामाला मनसेचा विरोध आहे. यासाठी मनसेचे वरळी येथील विधानसभेचे संभाव्य उमेदवार संदीप देशपांडे आणि मनसेचे कार्यकर्ते जांभोरी मैदानात उतरले आहेत.
वरळीत जांबोरी मैदानात ठाकरे गट आणि मनसे कार्यकर्त्यांचा वाद पोलीस स्टेशनला पोहोचला. वरळी पोलीस ठाण्यात ठाकरे गटाच्या कार्यकर्त्यांनी ठिय्या आंदोलन सुरु केलं आहे. तसेच खोटी माहिती देणाऱ्यांवर गुन्हा दाखल करावा, अशी मागणी ठाकरे गटाने पोलिसांकडे केली आहे. ठाकरे गटाच्या मागणीनंतर पोलीस काय कारवाई करतात, हे पाहावे लागेल.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.