Pune Traffic : अथर्वशीर्ष पठणानिमित्त पुण्यातील वाहतुकीत मोठे बदल; 'या' भागातील रस्ते आज राहणार बंद

पुण्यात मोठ्या थाटामाटात गणरायाचे आगमन झाले असून दर्शनासाठी भाविक मोठ्या प्रमाणात गर्दी करीत आहेत. त्यामुळे शहरातील अनेक भागात सध्या वाहतूक कोंडी होत आहे. त्यातच आज रविवारी ऋषीपंचमीनिमित्त श्रीमंत दगडूशेठ हलवाई गणपती ट्रस्टकडून बाप्पाचे अथर्वशीर्ष पठण करण्यात येणार आहे. त्यामुळे मध्यभागातील वाहतूक व्यवस्थेत बदल करण्यात आलाय.

वाहतूक पोलिसांनी दिलेल्या माहितीनुसार, रविवारी पहाटेपासून छत्रपती शिवाजी रस्त्यावरील जिजामाता चौक ते रामेश्वर मंदिर चौक दरम्यानचे रस्ते वाहतुकीसाठी बंद ठेवले जाईल. त्यामुळे वाहनचालकांनी गाडगीळ पुतळा चौक मार्गे गोविंद हलवाई चौकातून उजवीकडे वळण घ्यावे.

त्यानंतर मंडईतील गोटीराम भैय्या चौकमार्गे पुन्हा छत्रपती शिवाजी रस्त्यावरून आपल्या इच्छित स्थळी जाता येणार आहे. स्वारगेटकडे जाणाऱ्या वाहनांना हाच पर्यायी रस्ता उपलब्ध करुन देण्यात आला आहे. वाहतूक शाखेचे पोलीस उपायुक्त अमोल झेंडे यांनी यासंदर्भातील माहिती दिली आहे.

याशिवाय अप्पा बळवंत चौक ते हुतात्मा चौक दरम्यानचा रस्त्यावरील वाहतूक देखील बंद ठेवण्यात येणार आहे. त्याचबरोबर लक्ष्मी रस्त्यावरील विजय आणि सोन्या मारुती चौकातील वाहतूक आवश्यकतेनुसार वळवली जाणार आहे. त्यामुळे या भागातून जाणाऱ्या वाहनचालकांनी नेहरु चौकमार्गे इच्छितस्थळी जावे, असं सांगण्यात आलंय.

दरम्यान, श्रीमंत दगडूशेठ हलवाई गणपती ट्रस्टकडून आयोजित करण्यात आलेल्या या अथर्वशीर्ष पठणाच्या कार्यक्रमाला हजारो महिला भाविकांची उपस्थिती राहणार आहे. अथर्वशीर्ष पठणाची सांगता झाल्यानंतर सदरील भागातील वाहतूक पूर्ववत करण्यात येईल, अशी माहिती देखील वाहतूक पोलिसांनी दिली आहे.