Accident News : टिटवळ्यात विचित्र अपघात! भरधाव कंटेनरने १० ते १५ वाहनांना दिली धडक

संघर्ष गांगुर्डे, कल्याण

कल्याण जवळील टिटवाळा परिसरात आज सकाळच्या सुमारास भीषण अपघात झाला आहे. विरुद्ध दिशेने भरधाव वेगात येणाऱ्या कंटेनरने तब्बल दहा ते पंधरा वाहनांना जोरदार धडक दिल्याने एकच खळबळ उडाली. दैव बलवत्तर म्हणून मोठी जीवित हानी टळली आहे. मात्र मोठ्या प्रमाणावर गाड्यांचे नुकसान झाले आहे. नागरिकांनी अपघातानंतर कंटेनर चालकाला बेदम मारहाण केली.

मिळालेल्या माहितीनुसार, कंटेनर चुकीच्या दिशेने येत असल्याने रस्त्यावरून जाणाऱ्या दुचाकी, चारचाकी आणि रिक्षांना त्याची धडक बसली. काही क्षणांतच अनेक वाहनांचे मोठ्या प्रमाणात नुकसान झाले. सुदैवाने या अपघातात कोणतीही जीवितहानी झाली नसली तरी वाहनांचे मोठे आर्थिक नुकसान झाले आहे.

अपघातानंतर संतप्त नागरिकांनी कंटेनर चालकाला घटनास्थळीच पकडून पोलिसांच्या ताब्यात दिले. घटनेची माहिती मिळताच पोलिसांनी घटनास्थळी धाव घेत वाहतूक सुरळीत करण्याचे काम सुरू केले.

या प्रकारामुळे परिसरात काही काळ तणावाचे वातावरण निर्माण झाले होते.तसेच घटनास्थळी वाहतूक कोंडी निर्माण झाली होती. मात्र पोलिसांच्या हस्तक्षेपामुळे वाहतूक सुरळीत करण्यात आली. पोलिसांकडून पुढील तपास सुरू असून कंटेनर चालकाविरुद्ध योग्य ती कारवाई केली जाणार असल्याची माहिती सूत्रांनी दिली.