कुशिवली गावातील तनिष स्टोन क्रशर कंपनी बंद करा, राष्ट्रवादीची मागणी

डोंबिवली  - महाराष्ट्र राज्याचे जलसंपदा मंत्री जयंत पाटील यांची राष्ट्रवादी युवक काँग्रेस ठाणे जिल्हा अध्यक्ष सुधीर वंडारशेठ पाटील यांनी भेट घेतली असून कुशिवली गावतील तनिष स्टोन क्रशर कंपनी बंद करण्याबाबत पत्र दिले आहे. याबाबत सुधीर पाटील यांनी सांगितले की कल्याण पूर्व विधान सभेतील कुशिवली गावात तनिष स्टोन क्रशर  कंपनी असून सदर कंपनीचा मनमानी पद्धतीने कारभार सुरु आहे.

हे देखील पहा -

कंपनी करत असलेल्या स्फोटामुळे कुशिवली गावातील मोलमजुरी करून जीवन जगणाऱ्या शेकडो ग्रामस्थांच्या घरांना तडे पडले आहेत. तसेच गावातील विहिरी व बोरिंगचे पाणी पूर्णपणे नाहीसे झाले आहे. त्यामुळे गावात पाण्याची भीषण पाणी टंचाई निर्माण झाली आहे. सदर कंपनी विरोधात तहसीलदार अंबरनाथ यांच्याकडे वारंवार तक्रार करून देखील काहीही कारवाई केली जात नाही.

तरी या सर्व प्रकरणामुळे तेथील नागरिक त्रस्त झाले आहेत, असे पाटील यांनी सांगितले. तर यावर जलसंपदा मंत्री जयंत पाटील यांनी लगेचच अंबरनाथ तहसीलदार यांना संपर्क साधून क्रशर कंपनीवर कारवाई करण्याचे आदेश दिले. त्यावर तहसीलदार यांनी सांगितले की, क्रशर कंपनी बंद करण्यासाठी शासनास अहवाल दिला आहे. तसेच जलसंपदा मंत्री जयंत पाटील तहसीलदारांना कुशिवली गावाची पाण्याची व्यवस्था करण्याचे आदेश दिले.