Maharashtra Politics: शिंदेसेनेच्या बैठकीत राडा, बडा नेता ढसाढसा रडला

महानगपलिका निवडणूक अवघ्या 15 दिवसांवर येऊन ठेपली असताना आता महायुतीमधील धुसफूस दिसून येत आहे. एकीकडे ठाकरे बंधूंच्या युतीने महायुतीचे टेंशन वाढले असताना आता शिंदे गटातील वाद चव्हाट्यावर आला आहे. ठाकरे बंधूंचा जागा वाटपाचा तिढा सुटला असून उमेदवार अद्याप जाहीर झाले नाहीये. तसेच शिंदे गटाचा ठाणे, कल्याण-डोंबिवली, नाशिक या ठिकाणी जागा वाटपाचा फॉर्म्युला निश्चित नसताना आता पुणेमध्ये अंतर्गत नाराजी उफाळून आली आहे.

पुण्यामध्ये शिंदे गटाची बैठक सुरू असताना मोठा वाद निर्माण झाला आणि एक नेता थेट बैठक सोडून निघून गेला. महायुतीमधील अंतर्गत नाराजी कितीही लपवण्याचा प्रयत्न केला तरी तो आता चव्हाट्यावर येत आहे. ऐन निवडणुकीच्यावेळी पुण्यात शिंदे गटात नाराजीचा सुर पाहायला मिळत आहे. शहरातील रामी ग्रँड या हॉटेलमध्ये शिवसेनेची बैठक सुरू होती. या बैठकीला नीलम गोऱ्हे , विजय शिवतारे, रविंद्र धंगेकर आणि शहरप्रमुख नाना भानगिरे हे उपस्थित होते.

पुण्यात शिंदेसेनेतील अंतर्गत अस्वस्थतेचा स्फोट पुन्हा एकदा उघड झाला आहे. शहरातील पक्षाच्या आढावा बैठकीत शिवसेना शहरप्रमुख नाना भानगिरे यांना अश्रू अनावर झाले, तर काही वेळातच ते बैठक अर्धवट सोडून बाहेर पडल्याची घटना घडली. पुण्यातील या बैठकीत पक्षातील संघटनात्मक कामकाज, जबाबदाऱ्या आणि स्थानिक राजकारणावर चर्चा सुरू होती. मात्र बैठकीदरम्यान काही नेत्यांकडून झालेल्या टीका, दुर्लक्ष आणि नाराजीमुळे नाना भानगिरे भावनिक झाल्याचं सांगितलं जात आहे. उपस्थित कार्यकर्त्यांसमोरच ते ढसाढसा रडू लागल्याने सभागृहात एकच खळबळ उडाली.

या घटनेनंतर भानगिरे यांनी कोणतीही प्रतिक्रिया न देता बैठक सोडली. यामुळे पुण्यात शिंदेसेनेतील अस्वस्थता वाढल्याचं स्पष्ट झालं आहे. आधीच जागावाटप, पदे आणि निर्णयप्रक्रियेवरून नाराजीचे सूर उमटत असताना, आता थेट बैठकीत घडलेल्या या नाट्यामुळे पक्षातील अंतर्गत वाद पुन्हा चव्हाट्यावर आले आहेत. दरम्यान, या घटनेनंतर भानगिरे हे नॉटरीचेबल आहे.