University Exam Fee Hike: विद्यार्थ्यांवर खर्चाचा भार; विद्यापीठाच्या परीक्षा शुल्कात २०टक्क्यांनी वाढ

सागर आव्हाड, साम प्रतिनिधी

सावित्रीबाई फुले पुणे विद्यापीठाने परीक्षा शुल्कात २० टक्क्यांनी वाढ करण्याचा मोठा निर्णय घेतलाय.एकीकडे अतिवृष्टीमुळे शेतकऱ्यांच्या शेतातील पिकांची नासाडी झालीय. दुसरीकडे विद्यापीठाने विद्यार्थ्यांवर खर्चाचा भार वाढवलाय. सावित्रीबाई फुले पुणे विद्यापीठाच्या व्यवस्थापन परिषदेत आणि परीक्षा व मूल्यमापन मंडळाच्या बैठकीत परीक्षा शुल्क वाढवण्याचा निर्णय घेतलाय.

सावित्रीबाई फुले पुणे विद्यापीठाशी संलग्न अहिल्यानगर ,नाशिक व पुणे जिल्ह्यातील महाविद्यालयांमधील विद्यार्थ्यांच्या परीक्षा लवकरच सुरू होणार आहेत. विद्यापीठाने त्यासाठी परीक्षा अर्ज भरण्याची प्रक्रिया सुरू केली आहे.मात्र,परीक्षा शुल्कात २० टक्क्यांनी वाढ केली आहे. त्यामुळे विद्यार्थ्यांवर परीक्षा शुल्काचा वाढीव भार पडला आहे. याबाबत विद्यापीठातर्फे परिपत्रक प्रसिद्ध करण्यात आले आहे.

सावित्रीबाई फुले पुणे विद्यापीठाच्या व्यवस्थापन परिषदेत आणि परीक्षा व मूल्यमापन मंडळाच्या बैठकीत २०१८ ते २०२० मध्ये 15 टक्के शुल्क वाढ करण्यास मान्यता देण्यात आली होती. मात्र कोरोना काळात शुल्कवाढ करणे संयुक्तिक नसल्याने विद्यापीठाकडून शुल्क वाढ करण्याता निर्णय मागे घेण्यात आला होता.

सुमारे सात वर्षांपासून विद्यापीठाने परीक्षा शुल्कात वाढ केली नव्हती. परंतु २०२३-२४ व २०२४-२५ या शैक्षणिक वर्षात नवीन राष्ट्रीय शैक्षणिक धोरणाच्या अंमलबजावणीला सुरुवात झाली आहे. त्यामुळे परीक्षा पद्धतीत व परीक्षा घेण्याच्या विषयांमध्ये काही प्रमाणात वाढ झाली आहे. मागील काही वर्षांचा विचार करता विद्यापीठाकडून ५५ टक्के शुल्क वाढ करणे क्रमप्राप्त होते. मात्र विद्यापीठाने २०टक्के शुल्क वाढ करण्याचा निर्णय घेतला आहे. वाढीव परीक्षा शुल्काचा तपशील परिपत्रकामध्ये प्रसिद्ध करण्यात आलाय.