Pune Traffic: गणेशोत्सवाच्या काळात वाहतुकीत मोठे बदल; शहरातील मध्यवर्ती भागात जड वाहतूक बंद

गणेशोत्सवाच्या काळात शहरात नागरिकांची मोठी रेलचेल असते. साहित्य खरेदी व देखावे पाहण्यासाठी मोठ्या प्रमाणावर गर्दी होत असते. सुरक्षेच्या कारणास्तव पुणे शहरातील वाहतुकीत मोठे बदल करण्यात आली आहेत. शहरातील मध्यवर्ती भागात जड वाहतूक बंद करण्यात आलीय.

गणेशोत्सव २५ ऑगस्ट ते ७ सप्टेंबर दरम्यान साजरा केला जाणार आहे. या काळात पुणे शहरात भाविकांची मोठी वर्दळ असते. सुरक्षेची उपाययोजना व रस्त्यांवरून धावणाऱ्या जड/अवजड वाहनांमुळे नागरिकांना असुरक्षितता निर्माण होवून त्यांचे जीवितास धोका होवू नये. तसेच शहरातील खालील ठिकाणी वाहतुक सुरक्षित व सुरळीतपणे राहण्यासाठी पोलीस उप आयुक्त, वाहतुक शाखा पुणे शहर, हिंमत जाधव यांनी अत्यावश्यक सेवेतील वाहने म्हणजेच फायरब्रिगेड, पोलीस वाहने, रुग्णवाहिका, गणेश देखावे वाहतूक करणारी वाहने वगळून खालीलप्रमाणे आदेश जारी केले आहेत.

25 ऑगस्ट ते 07 सप्टेंबर 2025 पर्यंत पुढील नमुद रस्त्यांवर जड / अवजड वाहनांच्या वाहतूकीस 24 तास बंदी करण्यात आली आहे. शास्त्री रोड - सेनादत्त चौकी चौक ते अलका चौक, टिळक रोड - जेधे चौक ते अलका चौक, कुमठेकर रोड - शनिपार ते अलका चौक, लक्ष्मी रोड - संत कबीर चौक ते अलका चौक, केळकर रोड - फुटका बुरुज ते अलका चौक, बाजीराव रोड - पुरम चौक ते गाडगीळ पुतळा, शिवाजी रोड - गाडगीळ पुतळा ते जेधे चौक, कर्वे रोड - नळस्टॉप चौक ते खंडोजीबाबा चौक,

फर्ग्युसन कॉलेज रोड - खंडोजीबाबा चौक ते विर चाफेकर चौक, जंगली महाराज रोड - स.गो. बर्वे चौक ते खंडोजीबाबा चौक, सिंहगड रोड - राजाराम ब्रिज ते सावरकर चौक, गणेश रोड / मुदलियार रोड – पॉवरहाऊस – दारुवाला - जिजामाता चौक - फुटका बुरुज चौक या प्रमाणे करण्यात आलेल्या वाहतुक बदलांचा अवलंब करून गणेशोत्सव शांततेने पार पाळण्यास व वाहतुक सुरळीत ठेवण्यास पुणे शहर वाहतुक पोलीसांना सहकार्य करावे, असे आवाहनही पोलीस उप आयुक्त, वाहतुक शाखा पुणे शहर, हिंमत जाधव यांनी प्रसिध्दी पत्रकान्वये केले आहे.

गणेश प्रतिष्ठापना म्हणजेच बुधवारी शिवाजी रोड वरील गाडगीळ पुतळा चौक ते गोतीराम भैय्या चौक वाहतुकीसाठी बंद करण्यात आला आहे. फडके हौद चौक ते जिजामाता चौक, फुटका बुरूज तसेच अप्‍पा बळवंत चौक ते बुधवार चौक, मोती चौक त्याच बरोबर मंगला टॉकीज समोरील रस्ता बंद करण्यात आलाय.

शिवाजीनगर बसस्‍थानकावरून शिवाजी रस्‍त्‍याने स्‍वारगेटला जाणाऱ्या बस या स.गो. बर्वे चौकातून जंगली महाराज रस्‍ता आणि टिळक रस्‍त्‍याने स्‍वारगेटला जातील. मनपा बसस्‍थानकावरून स्‍वारगेटला जाणाऱ्या बस या जंगली महाराज रस्‍ता, अलका टॉकीज चौक, टिळक रस्‍ता, शास्‍त्री रस्‍त्याने स्‍वारगेटला जातील.