Pune Terrorist News Update: पुणे दहशतवादी प्रकणात ATS ची मोठी कारवाई, ठाण्यातून पाचव्या आरोपीला अटक

अक्षय बडवे, पुणे

Pune News: पुणे दहशतवादी प्रकरणामध्ये (Pune Terrorist Case) एटीएसने मोठी कारवाई केली आहे. याप्रकरणी एटीएसने आणखी एकालाे अटक केली आहे. पुण्यातल्या कोथरुड परिसरातून अटक (Pune Terrorist Arrest) करण्यात आलेल्या दोन दहशतवाद्यांशी या व्यक्तीचा संबंध असल्याच्या संशयावरुन त्याला अटक करण्यात आली आहे. आतापर्यंत या प्रकरणात एटीएसने ५ जणांना अटक केली आहे.

मिळालेल्या माहितीनुसार, कोथरूडमधून अटक केलेल्या दोन दहशतवाद्यांशी संबंध असल्याच्या संशयावरून राज्य दहशतवादी विरोधी पथक म्हणजे एटीएसने आणखी एका आरोपीला अटक केली आहे. ठाणे जिल्ह्यातल्या पडघा यथे राहणारा झुल्फिकार अली बडोदावाला असं अटक केलेल्या पाचव्या आरोपीचे नाव आहे. एटीएसने याआधी चार जणांना अटक केली होती. आता याप्रकरणात आणखी एकाला अटक करण्यात आल्यामुळे पाच जण झाले आहेत.

अटक करण्यात आलेला झुल्फिकार अली बडोदावाला राष्ट्रीय तपास संस्थेच्या (एनआयए) कोठडीत होता. न्यायालयाची परवानगी घेऊन त्याला चौकशीसाठी ताब्यात घेण्यात आले आहे. २८ जून २०२३ रोजी इसीस दहशतवादी संघटनेच्या इशाऱ्यावर कारवाया केल्याप्रकरणी चार जणांना अटक केली होती. त्यात झुल्फिकार अली बडोदावाला याचा समावेश होता.

'एनआयए'ने महाराष्ट्र इसीस मॉड्यूलप्रकरणी डॉ. अदनान अली सरकार याला कोंढव्यातून नुकतीच अटक केली होती. झुल्फिकार हा अदनान अली याचा निकटवर्तीय असल्याचे सांगितले जात आहे. त्यावरून पुण्यात पकडलेले दहशतवादी आणि इसीसचे 'कनेक्शन' असल्याचा संशय देखील व्यक्त केला जात आहे. दरम्यान, झुल्फिकार अली बडोदावालाच्या चौकशीतून आणखी धक्कादायक माहिती समोर येण्याची शक्यता आहे.