Pune News: आयडी दाखवा आणि आखाड साजरी करा, पुण्यात तब्बल ५००० किलो चिकनचे वाटप

अक्षय बडवे, साम टिव्ही प्रतिनिधी

पुणेकरांचा काही नेम नाही! आखाडचा शेवटचा रविवार निमित्त चिकन मटणच्या दुकानाबाहेर रांग आहेच पण याच दिवसाचा फायदा राजकीय पुढाऱ्यांकडून सुद्धा घेतला जातोय. याचं कारण म्हणजे पुण्यातील धानोरी परिसरात एका दांपत्याने तब्बल ५००० किलो चिकन मोफत वाटण्याचा उपक्रम राबवला आहे. मतदार यांच्यापर्यंत पोहचता यावं आणि जनसंपर्क वाढावा म्हणून ही शक्कल पुण्यात पाहायला मिळते आहे. चिकन घेण्यासाठी प्रत्येक व्यक्तीकडून ओळखपत्र घेतलं जातं आहे आणि मगच चिकन फ्री मिळतंय.

पुणेकर हे खवय्ये म्हणून फक्त देशात नाही तर भारतात प्रसिद्ध आहेत असं मानलं जातं. आता आखाडचा शेवटचा रविवार म्हणल्यावर पुणेकर सुट्टी देणार का? यावर्षी गटारी अमावस्या गुरुवारी येते त्यामुळे सुट्टी नसल्याने सर्वजण आखाड्याचा शेवटचा रविवार अगदी जोरात साजरी करायचा म्हणून सकाळपासूनच प्लॅन करत आहेत. पुण्यातील प्रत्येक चिकन मटन आणि मासोळी दुकानांच्या बाहेर नागरिकांनी सकाळपासूनच गर्दी केलीय.

आता पुण्यात राजकीय पुढारी किंवा पदाधिकारी नेहमीच अशा दिवसांचा फायदा करून घेतात. आखाडाचा शेवटचा रविवारचा फायदा सुद्धा पुढाऱ्यांनी केलाय बरं का. पुण्यातील धानोरी परिसरात धनंजय जाधव फाउंडेशन यांच्या वतीने चक्क नागरिकांसाठी ५००० किलो चिकन मोफत ठेवलं आहे. धानोरी परिसरातील ४ दुकानांवर हा उपक्रम राबवला जातोय. ओळख पत्र दाखवायचं आणि चिकन मोफत न्यायचं! असं सोपं असेल तर पुणेकर नाही म्हणणार का? धानोरी परिसरातील नागरिकांनी या दुकानांवर एकच गर्दी केलीय.

या उपक्रमाबद्दल बोलताना, धनंजय जाधव म्हणाले, "सगळे राजकीय पक्षाचे नेते आखाड पार्टी फक्त विशेष चेहऱ्यांना पाहून देतात. आखाड सगळ्यांनाच साजरी करता यावा यासाठी ही कल्पना सुचली. एका किलो मध्ये कुटुंबातील ४ जणं तर नक्की जेवतात त्यामुळे सगळ्यांना हा दिवस साजरा करता यावा."

मोफत चिकन वाटप करत असताना यंत्रणांनी सुद्धा त्यांच्याकडून चोख कार्यवाही बजावली आहे. पोलिसांकडून या ठिकाणी असलेल्या चिकनचे नमुने तपासणीसाठी सुद्धा नेले आहेत. एकंदरीत काय तर आखाड स्पेशलसाठी पुण्यात आज सकाळपासून नागरिकांमध्ये सुद्धा मोठा उत्साह पाहायला मिळतोय.