Pune Accident : पुण्यात भीषण अपघात, डंपर अचानक राँग साईडला गेला, पिकअपला उडवलं, दोघांचा जागीच मृत्यू

रोहिदास गाडगे, साम टीव्ही, प्रतिनिधी

Pune News : पुणे जिल्ह्यातील शिरूर तालुक्यात अपघात झाला आहे. मांडवगण फराटा येथे डंपर आणि पिकअप जीप जोरदार धडक दिल्याने भीषण अपघात घडला आहे. या अपघातात दोघांचा मृत्यू झाला असून एक जण गंभीररित्या जखमी झाल्याची माहिती समोर आली आहे. डंपर चालकाच्या चुकीमुळे हा अपघात झाल्याचे म्हटले जात आहे.

मांडवगण फराटा येथे झालेल्या दुर्दैवी अपघातात सागर संभाजी कोळपे (वय २८) आणि यश सुधाकर भिसे (वय १२) यांचा जागीच मृत्यू झाला आहे. तर अनिल बिरा कोळपे हे गंभीर जखमी झाले आहेत. पिकअप जीपला एका डंपरने जोरदार धडक केली. अपघातानंतर चालक घटनास्थळावरून फरार झाल्याचे समोर आले आहे.

डंपर चालकाने चुकीच्या दिशेने वाहन चालवत पिकअपला धडक दिली. अपघात झाल्यानंतर चालक तेथून पळून गेला. शिरूर पोलिसांनी डंपर चालकाच्या विरुद्ध गुन्हा दाखल केला आहे. चालकाचा शोध सुरु असून पोलीस अधिक तपास करत आहेत. या घटनेमुळे मांडवगण फराटा आणि परिसरात हळहळ व्यक्त केली जात आहे.

शिरूर तालुक्यातील मांडवगण फराटा येथे एका डंपरने पिकअप जीपला जोरदार धडक दिली. डंपर चुकीच्या दिशेने येत असताना हा अपघात झाला. या अपघातामध्ये पिकअप जीपमधील दोघांचा जागीच मृत्यू झाला. तर एकजण गंभीररित्या जखमी झाला आहे. जखमी अनिल कोळपे यांच्यांवर रुग्णालयात उपचार सुरु असून त्यांची प्रकृती चिंताजनक आहे.