31st night party : थर्टी फर्स्टला टल्ली झालात तर...; हॉटेल मालकांनी घेतला महत्वाचा निर्णय

अक्षय बडवे, साम टीव्ही

Pune 31 st Night Party Celebration : सरत्या वर्षाला निरोप देत नव्या वर्षाचे स्वागत करण्यासाठी सर्वजण सज्ज आहेत. नववर्षाच्या पूर्वसंध्येला ग्राहकांची गैरसोय होऊ नये यासाठी पुण्यातील पब, कॅफे, हॉटेल्सकडून जोरात तयारी सुरू आहे. या प्रसंगी काही हॉटेल,रेस्टॉरंट मालकांनी 'ड्रिंक केलेल्या ग्राहकांना घरी सोडण्याची सोय' करण्याचा निर्णय घेतला आहे.

नववर्षानिमित्त पुण्यात अनेक ठिकाणी विविध प्रकारच्या पार्ट्यांचे आयोजन करण्यात आले आहे. या पार्ट्या ३१ डिसेंबर रोजी सुरु झालेली पार्टी १ जानेवारी पहाटे ५ वाजेपर्यंत सुरु असणार आहे. तेव्हा पुणेकरांच्या सोयीसाठी काही हॉटेल्सनी मद्यपान केलेल्या ग्राहकांना घरी सोडण्याची सुविधा उपलब्ध केली आहे. ३१ डिसेंबरला मध्यरात्री अनेकजण पार्टीत मद्यपान करतात आणि वाहने चालवतात. मद्यपान केल्याने अपघातांचे प्रमाण वाढते. ही गोष्ट लक्षात घेऊन हॉटेल्स असोसिएशनच्या वतीने काही नियम बनवण्यात आले आहेत.

पुणे हॉटेल्स असोसिएशनचे अध्यक्ष गणेश शेट्टी यांनी माध्यमांना दिलेल्या मुलाखतीमध्ये संबंधित प्रकाराची माहिती दिली. 'काही वर्षांप्रमाणे यावर्षीही पहाटे पाच वाजेपर्यंत हॉटेल्स सुरु ठेवण्याची परवानगी दिल्याबद्दल शासनाचे आभार. पार्टीला येणारा प्रत्येक ग्राहक हा आपला जबाबदारी आहे. एखादा ग्राहक अतिप्रमाणात मद्यपान करत असेल, तर त्याच्यासोबत असलेल्यांना सांगून ड्रिंक सर्व्ह करणे बंद करावे असे आवाहन आम्ही सर्व हॉटेल्सना केले आहे.' असे त्यांनी म्हटले.

"जर ग्राहकाला जास्त झाली असेल तर त्याला ड्रिंक सर्व्ह करु नये. जास्त मद्यपान केलेला ग्राहक जर स्वत: गाडी चालवणार असेल, तर त्याला कॅब करुन घरी सोडले जाईल. त्याने गाडीची चावी हॉटेलमध्ये ठेवली तर ती चावी दुसऱ्या दिवशी ग्राहकापर्यंत पोहोचवू", असेही गणेश शेट्टी यांनी म्हटले आहे. नववर्षाला गालबोट लागू नये या उद्देशाने पुण्यातील हॉटेल असोसिएशनने हा निर्णय घेतला आहे.