Pune News: बॉडी बिल्डिंग करणाऱ्यांनो सावधान, पुण्यात स्टेरॉइडची होतेय विक्री; पाहा VIDEO

अक्षय बडवे, पुणे

बॉडी बिल्डिंग (Body Building) करणाऱ्यांसाठी महत्वाची बातमी आहे. पुण्यामध्ये स्टेरॉइडची विक्री होत असल्याची धक्कादायक माहिती समोर आली आहे. पुण्याच्या सातारा रोड परिसरात ही घटना घडली आहे. याप्रकरणी जिमच्या कोचला अटक करण्यात आली आहे. त्याच्याकडून १३ इंजेक्शन आणि ५ सीरीज जप्त करण्यात आल्या आहेत. याप्रकरणाचा तपास भारती विद्यापीठ पोलिसांकडून सुरू आहे.

कमी काळात चांगली बॉडी व्हावी यासाठी अनेक तरुण हे शरीराला हानिकारक असलेले स्टेरॉइड घेत असतात. पुण्यात एका जिम कोचने चक्क स्टेरॉइडची विक्री केल्याचा प्रकार समोर आला आहे. पुण्यातील सातारा रोड परिसरात असणाऱ्या 'मास्टरपिस जिम'मध्ये एका जिम कोचने या स्टेरॉइडची विक्री केली आहे.

मेफेनटरमाईन सल्फेट इंजेक्शन असे या स्टेरॉइडचे नाव असून पोलिसांनी ते जप्त केले आहेत. आझाद खान असे या जिम कोचचे नाव असून त्याला अटक करण्यात आली आहे. आतापर्यंत त्याच्याकडून १३ इंजेक्शन आणि ५ सीरींज जप्त करण्यात आल्या आहेत. या एका इंजेक्शनची किंमत ४०० रुपये असून आतापर्यंत अनेक बॉडी बिल्डिंग करणाऱ्या तरुणांना त्याने हे इंजेक्शन विकल्याचे समोर आले आहे. आझाद खानविरोधात कलम ३३६, २७६ अन्वये गुन्हा दाखल करण्यात आला आहे. पोलिस या प्रकरणाचा तपास करत आहेत.