Pune News: दिव्यांग मुलाने टोकाचे पाऊल उचलले; व्यायामासाठी घराबाहेर पडला, २ दिवसानंतर विहिरीत सापडला मृतदेह

अक्षय बडवे, पुणे

व्यायामासाठी घराबाहेर पडलेल्या तरुणाचा विहिरीमध्ये मृतदेह आढळल्याची धक्कादायक घटना पुण्यात घडली आहे. पुणे जिल्ह्यातल्या डोंगरगाव येथील ही घटना आहे. हा तरुण घराबाहेर पडला खरा पण तो परत न आल्यामुळे कुटुंबीयांना त्याचा शोध घेतला. पण विहिरीमध्ये त्याचा मृतदेह आढळला. या तरुणाने आत्महत्या केल्याचा संशय व्यक्त केला जात आहे. लोणीकंद पोलीस ठाण्यात या घटनेची नोंद केली आहे.

मिळालेल्या माहितीनुसार, गौरव भाऊसाहेब भोरडे असे १९ वर्षीय दिव्यांग तरुणाचे नाव आहे. पुणे जिल्ह्यातील डोंगरगावमध्ये तो आपल्या कुटुंबीयांसोबत राहत होता. दोन दिवसांपूर्वी तो बेपत्ता झाला होता. त्याचा मृतदेह गावातील विहिरीमध्ये आढळून आला. त्यामुळे त्यांच्या कुटुंबीयांना मोठा धक्का बसला. गौरवने विहिरीमध्ये उडी मारून आत्महत्या केल्याचे म्हटले जात आहे.

पोलिसांनी दिलेल्या माहितीनुसार, गौरव दररोज व्यायाम करण्यासाठी घराबाहेर जायचा. शनिवारी सायंकाळी तो व्यायामासाठी बाहेर पडला खरा मात्र रात्र होऊन सुद्धा तो घरी आला नाही. त्यामुळे त्याच्या घरच्यांनी त्याचा शोध घेण्यास सुरुवात केली. त्याचा मोबाईल ही बंद होता. कुटुंबीयांनी लोणीकंद पोलिस ठाण्यामध्ये गौरव हरविल्याची तक्रार दिली.

गौरवचे कुटुंबीय आणि पोलिसांनी त्याचा शोध घेतला. पण तो कुठेस भेटला नाही. शेवटची दोन दिवसांनंतर त्याचा मृतदेह बुर्केगाव येथील एका विहिरीत आढळून आला. त्याचा बुडून मृत्यू झाल्याने अनेक तर्क वितर्क व्यक्त करण्यात आले. मात्र पोलिसांनी तपास केला असता त्याने आत्महत्या केल्याचे निष्पन्न झाले आहे. याप्रकरणी पोलिसांनी गौरवच्या मृत्यूची नोंद केली आहे.