Pune Crime News : तरूण व्यावसायिकाला थाप मारून फ्लॅटवर नेले, फोटो काढले; त्यानंतर घडलं ते भयंकर...

सचिन जाधव

Pune Crime News Update : पुण्यातील हडपसर परिसरातील धक्कादायक घटना उघडकीस आली आहे. बिझनेसबाबत बोलायचं आहे असं सांगून तरूण व्यावसायिकाला फ्लॅटवर नेले आणि त्याच्यासोबत तरुणीने फोटो काढले. त्यानंतर बलात्काराची तक्रार करण्याची धमकी देऊन त्याच्याकडून साडेसतरा लाख रुपये उकळले. या प्रकरणी एका वकिलाला हडपसर पोलिसांनी अटक केली आहे. (Tajya Batmya)

बिझनेसबाबत बोलायचे असल्याचे सांगून तरूणीने एका तरूण व्यावसायिकाला फ्लॅटवर नेले. तिथे तरुणीने त्याच्यासोबत फोटो काढले. त्यानंतर त्या व्यावसायिकाला बलात्काराची तक्रार करीन, अशी धमकी दिली आणि त्याच्याकडून १७ लाख ५० हजार रुपये लुटले. पुण्यातील हडपसर परिसरात ही घटना घडली असून, पोलिसांनी संशयित आरोपी वकिलाला अटक केली.

विक्रम (वय ३५, रा. हडपसर) असे अटक करण्यात आलेल्या वकिलाचे नाव आहे. तसेच निधी (वय २५, रा. वाघोली) हिच्यावर गुन्हा दाखल केला आहे. या प्रकरणी मगरपट्टा सिटी येथील एका ४२ वर्षांच्या व्यावसायिकाने हडपसर पोलीस ठाण्यात तक्रार दिली होती.

हडपसर परिसरात एका कार्यालयात ३ ऑगस्ट २०२२ पासून आतापर्यंत हा प्रकार सुरू होता. या घटनेचा अधिक तपास हडपसर पोलीस करत आहेत.

१८ लाखांचा गुटखा पकडला

पुण्यातील इंदापूर पोलिसांनी मोठी कारवाई केली आहे. १८ लाख रुपये किंमतीच्या गुटख्यासहीत २४ लाखांचा मुद्देमाल जप्त केला आहे. इंदापूर पोलिसांनी अकलूज - पुणे दरम्यान गुटख्याची अवैधपणे वाहतूक करणारे वाहन ताब्यात घेतले. १८ लाख रुपयांच्या गुटख्यासहित २४ लाखांचा मुद्देमाल जप्त केला आहे. हा एवढ्या मोठ्या प्रमाणात माल कुठे व कोणासाठी घेऊन निघाले होते, याचा तपास पोलीस करत आहेत.