Pune News : पोलिसांवर कोयता घेऊन धावला, आता धड चालताही येईना; आरोपींची काय अवस्था झाली एकदा पाहाच

मागील काही दिवसांपासून पुणे शहरात पुन्हा एकदा कोयता गँगने धुडगूस घालायला सुरुवात केली आहे. दिवसाढवळ्या कोयता गँगचे गुंड वाहनांची तोडफोड तसेच नागरिकांना धमकावत असल्याचं समोर आलंय. या गुंडांचा चांगलाच बंदोबस्त करा, अशी मागणी नागरिकांकडून केली जात आहे. त्यामुळे पुणे पोलिसांना कोयता गँगच्या मुसक्या आवळण्यास सुरुवात केली आहे.

अशातच कोयता गँगच्या गुंडांना पकडण्यासाठी गेलेल्या एका सहाय्यक पोलीस निरीक्षकावर गुंडांनी हल्ला केला होता. या हल्ल्यात रत्नदीप गायकवाड हे गंभीर जखमी झाले होते. त्यांच्या डोक्यात गुंडांनी कोयता हाणला होता. यानंतर दोन्ही गुन्हेगार घटनास्थळावरून पसार झाले होते.

पोलिसांवर कोयता गँगच्या गुंडांनी हल्ला केल्यामुळे शहरात मोठी खळबळ उडाली होती. यानंतर पोलिसांनी अवघ्या 12 तासात या आरोपींचा शोध घेऊन त्यांच्या मुसक्या आवळल्या आहेत. या गुंडांना पोलिसांनी वर्दीचा चांगलाच इंगा दाखवला असून त्यांना प्रसाद देखील दिलाय.

हा प्रसाद इतका गोड होता, की दोन्ही गुंडांना नीट चालता सुद्धा येत नव्हते. सध्या दोन्ही आरोपींचा एक व्हिडीओ सोशल मीडियावर तुफान व्हायरल होतोय. या व्हिडीओत आरोपींच्या हातात तसेच पायात बेड्या आहेत. त्यांना नीट चालताही येत नाहीये. पोलिसांच्या अंगावर हात टाकल्याने काय स्थिती होते, हेच यामधून दिसून येतंय.

पुण्यात आढळला अनोळखी तरुणीचा मृतदेह

पुण्यातील खराडी परिसरातल्या नदीपात्रात एका अनोळखी तरुणीचा मृतदेह आढळून आला आहे. या घटनेनं शहरात मोठी खळबळ उडाली आहे. या तरुणीची हत्या करून तिचे हात आणि पाय तोडण्यात आले आहेत. तसेच तिचे शीर देखील धडावेगळं करण्यात आलंय. सध्या पोलिसांकडून मृत तरुणीची ओळख पटवणे सुरु असून याप्रकरणी चंदननगर पोलिसांत गुन्हा दाखल करण्यात आलाय.