Pune News | पुण्यात FTII च्या २५ वर्षीय विद्यार्थिनीनं संपवलं आयुष्य, लेक्चरला न आल्यानं खोलीत जाऊन बघितलं तर....

Pune News | पुणे: पुण्यात धक्कादायक घटना उघडकीस आली आहे. शहरातील फिल्म अँड टेलिव्हिजन इन्स्टिट्युट ऑफ इंडिया (FTII) मधील विद्यार्थिनीनं गळफास घेऊ आत्महत्या केली. ही घटना उघडकीस आल्यानंतर खळबळ उडाली आहे.

मिळालेल्या माहितीनुसार, पुण्यातील फिल्म अँड टेलिव्हिजन इन्स्टिट्युट ऑफ इंडिया अर्थात (FTII) मध्ये शिक्षण घेणाऱ्या विद्यार्थिनीनं टोकाचं पाऊल उचललं आहे. तिनं गळफास घेऊन आपली जीवनयात्रा संपवली. कामाक्षी बोहरा (वय २५) असे या तरुणीचे नाव आहे.

कामाक्षी ही मूळची झारखंड येथील रहिवासी होती. पुण्यातील एफटीआयआय या संस्थेत ती शिक्षण घेत होती. आज, गुरुवारी ती सकाळी लेक्चरला आली नाही. त्यामुळे शिक्षकांनी ती राहत असलेल्या खोलीत जाऊन पाहण्यास सांगितलं. त्यानंतर ही धक्कादायक घटना उघडकीस आली. खोलीमध्ये ती गळफास घेतलेल्या अवस्थेत आढळून आली.

वैफल्यग्रस्त असल्याने तिने हे टोकाचे पाऊल उचलले असावे, असा प्राथमिक अंदाज वर्तवण्यात येत आहे. गेल्याच महिन्यात एफटीआयआयमध्ये फोटोग्राफीचं शिक्षण घेणाऱ्या ३२ वर्षीय तरुणानंही आत्महत्या केली होती.