पुणे : पुण्यात गुन्हेगारीचं प्रमाण काही करता कमी होत नाहीय. दररोज हत्या, बलात्कार यांसारख्या घटना घडत असल्याचं समोर येतंय. यातच आता अजून एक धक्कादायक घटना समोर आली आहे. या घटनेनं पुणे शहरात खळबळ उडाली आहे. किरकोळ वादातून मामाने १५ वर्षीय भाच्याच्या छातीवर चाकूने वार करुन खून केल्याची घटना सिंहगड रस्त्यावरील नऱ्हे भागात घडली आहे. हत्येनंतर फरार झालेल्या आरोपी मामाला सिंहगड रस्ता पोलिसांनी अटक केली आहे.
गजानन गजकोश (वय १५, रा.धारावी, कोळी वाड्याजवळ, मुंबई) असं खून झालेल्या भाच्याचं नाव आहे. तर या प्रकरणी मेघनाथ अशोक तपासे (वय ४१, रा. मानाजीनगर, नऱ्हे) याला अटक करण्यात आली आहे. गजानन हा मामा मेघनाथ याच्याकडे राहण्यासाठी आला होता. शुक्रवारी रात्री त्याचा त्याच्या मामाच्या मुलाशी वाद झाला. वादातून मेघनाथने भाचा गजाननला पट्ट्याने बेदम मारहाण केली. त्यानंतर स्वयंपाकघरातील चाकूने त्याच्या छातीवर वार केला. चाकूने भोसकल्याने मोठ्या प्रमाणावर रक्तस्त्राव झाला.
गंभीर जखमी अवस्थेतील गजाननला तातडीने रुग्णालयात नेले. मात्र उपचारापूर्वीच त्याचा मृत्यू झाला होता. आरोपी मेघनाथला रात्री उशीरा अटक करण्यात आली. प्राथमिक चौकशीत किरकोळ वादातून आरोपी मेघनाथने भाच्याचा भोसकून खून केल्याची माहिती मिळाली आहे. अधिक तपास सिंहगड रोड पोलीस करत आहेत.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.