राज ठाकरे यांच्या सभेआधी पुण्यात मनसेला धक्का; कट्टर कार्यकर्त्याचा पक्षाला रामराम

पुणे : महाराष्ट्र नवनिर्माण सेनेचे अध्यक्ष राज ठाकरे (MNS Chief Raj Thackeray) हे 22 मे रोजी पुण्यात सभा घेणार आहे. मात्र पुण्याच्या सभेआधी (Raj Thackeray Pune Sabha) मनसेला मोठा धक्का बसला आहे. पुण्यातील मनसेचे माथाडी कामगार सेनेचे शहराध्यक्ष निलेश माझीरे ((MNS Nilesh Mazire) मनसे सोडणार असल्याची माहिती समोर आली आहे. वसंत मोरे यांचे कट्टर समर्थक म्हणून ओळख असलेले माझीरे मनसेला राम-राम ठोकणार असल्याने पुण्यात मनसेला हा मोठा धक्का मानला जात आहे. (MNS Nilesh Mazire Resigns)

राज ठाकरे यांचे निकटवर्तीय आणि पुण्यातील मनसे नेते वसंत मोरे यांचे कट्टर समर्थक म्हणून निलेश माझीरे यांची ओळख आहे. पुणे मनसे माथाडी कामगार सेनेचे शहराध्यपद त्यांच्याकडे होते. मात्र काही दिवसांपासून ते नाराज असल्याची चर्चा रंगली होती. त्यामुळे पक्षातील अंतर्गत वाद आणि गटबाजी यामुळे निलेश माझीरे आता पक्षाला रामराम ठोकणार आहेत. माझीरे यांनी शिवसेनेचे संपर्क नेते सचिन अहिर यांची भेट घेतली आहे. लवकरच ते आता शिवसेनेत प्रवेश करणार असल्याची चर्चा आहे.

दरम्यान, राज ठाकरे यांची पुण्यातील सभा निश्चित झाली आहे. रविवारी २२ मे रोजी सकाळी १० वाजता गणेश कला मंच येथे सभा होणार आहे. याअगोदर २१ मे रोजी नदीपात्र येथे राज ठाकरे यांची सभा होणार असल्याचे जाहीर करण्यात आले होते. मात्र, तेथे सुरू असलेले मेट्रोचे काम, पावसाची शक्यता तसेच मैदान तयार करण्यासाठी असलेला अपुरा वेळ यामुळे हे ठिकाण रद्द करण्यात आले होते.

त्यानंतर राज ठाकरे यांच्या सभेची अधिकृत घोषणा मनसेचे प्रदेश सरचिटणीस अजय शिंदे यांनी केली. एकीकडे राज ठाकरे यांची पुण्यात सभा आणि दुसरीकडे वसंत मोरे यांचे अनेक कट्टर समर्थक मनसेला सोडचिठ्ठी देत शिवसेनेचा हाती घेत असल्याने मनसेत खळबळ उडाली आहे.

Edited By - Satish Daud