Pune News: पुण्याचं बदलापूर होतंय, वाचा स्पेशल रिपोर्ट...

भरत मोहोळकर, साम टीव्ही, प्रतिनिधी

पुण्यात 21 वर्षीय तरुणीवर सामुहिक अत्याचार झाल्याची संतापजनक घटना घडलीय. पुण्याच्या बोपदेव घाटातही आपल्या मित्रासोबत फिरायला गेलेल्या 21 वर्षीय तरुणीवर सामुहिक बलात्काराची हादरवणारी घटना घडलीय. बोपदेव घाटात नेमकं काय घडलं, हेच जाणून घेऊ...

पुण्याजवळ बोपदेव घाटात तरुण-तरूणी फिरायला गेले होते. रात्री अकराच्या सुमारास घाटात गप्पा मारत होते. बाईकवरून आलेल्या तिघांनी दोघांना धमकावलं. यानंतर तरूणीच्या मित्राला तिघांनी बांधून ठेवलं. तिघांनी तरूणीवर सामूहिक बलात्कार केला. बलात्कार करून तिघे आरोपी फरार झाले. पुढे मित्राने पीडित तरूणी रुग्णालयात दाखल केलं. या सामुहिक अत्याचाराची पहाटे 5 वाजता पोलिसांना माहिती मिळाली आणि तपासाची चक्रं फिरवत आरोपींना ताब्यात घेतल्याचं पोलिसांनी सांगितलंय.

नुकतच पुण्यातील स्कूल व्हॅनमध्ये 6 वर्षीय चिमुकल्यांवर लैंगिक अत्याचाराचं प्रकरण उघडकीस आलं त्याला 24 तासही उलटले नाहीत तोच पुण्यात आणखी एक अत्याचाराची घटना घडलीय..मात्र पुण्यात या दोनच घटना घडल्या नाहीत तर विद्येचं माहेरघर असलेलं गुन्हेगारांचं माहेरघर बनल्याचं चित्र निर्माण झालंय.

गुन्हेगारीचं माहेरघर पुणे

27 सप्टेंबर - नामांकित महाविद्यालयात अल्पवयीन तरुणीवर अत्याचार

30 सप्टेंबर- स्कूल व्हॅनमध्ये चालकाकडून चिमुकल्यांवर अत्याचार

2 ऑक्टोबर- बोपदेव घाटात अपहरण करून तरुणीचा विनयभंग

3 ऑक्टोबर- बोपदेव घाटात तरुणीवर सामुहिक अत्याचार

1 ऑक्टोबर - धावत्या वाहनावर कोयत्याने हल्ल्याचा प्रयत्न

विद्येचं माहेरघर,सांस्कृतिक पुणे अशा बिरुदावल्या मिरवणारं पुणे गेल्या काही वर्षात गुन्हेगारांचं माहेरघर बनलंय. कधी पोर्श कारनं निष्पांपाना चिरडलं जातं, तर कधी ड्रग्जचे साठे तर कधी चिमुकल्यांवर अत्याचार अन् आता चक्क गँगरेप...पुण्याची वाताहत होतेय..त्यामुळे कायदा सुव्यवस्थेच्या स्तरावर पुणे सपशेल अपयशी ठरलंय. त्यामुळे गरज आहे ती अशा प्रवृत्तींना वेळीच ठेचायची, ठोस उपाययोजनांची.