Pune : पुण्यात भयंकर घडलं! आईने पोटच्या २ मुलांसह विहिरीत उडी मारून संपवलं जीवन; धक्कादायक कारण समोर

गोपाळ मोटघरे, पुणे

Pune Aambegaon 3 Sucide Case News Update पुणे जिल्ह्यातील आंबेगाव तालुक्यातील गोहे बुद्रुक गावात एक अत्यंत दुर्दैवी घटना घडली आहे. एका महिलेने आपल्या दोन लहान मुलांसह विहिरीत उडी घेत जीवन संपवले. प्राथमिक अंदाजानुसार, कौटुंबिक वादातून महिलेने टोकाचा निर्णय घेतला असावा असा अंदाज व्यक्त करण्यात आला आहे. या घटनेमुळे परिसरात हळहळ व्यक्त केली जात असून आत्महत्येमागील नेमके कारण अद्याप स्पष्ट झालेले नाही.अश्विनी तानाजी वाळकोळी, मुलगी अक्षिता आणि मुलगा कार्तिक अशी मृतांची नावे आहेत.

मिळालेल्या माहितीनुसार, गोहे बुद्रुक (Pune Gohe Budruk) येथील अश्विनी तानाजी वाळकोळीनी (Ashwini Walkoli Sucide) आपली मुलगी अक्षिता आणि मुलगा कार्तिक यांच्यासह गावातील एका विहिरीत उडी घेतल्याची धक्कादायक घटना समोर आली. घटनेची माहिती मिळताच ग्रामस्थांनी तातडीने घटनास्थळी धाव घेतली. स्थानिकांच्या मदतीने तिघांनाही विहिरीतून बाहेर काढण्यात आले.

यानंतर अश्विनी वाळकोळी आणि त्यांच्या दोन्ही मुलांना तातडीने घोडेगाव ग्रामीण रुग्णालयात उपचारासाठी दाखल करण्यात आले. मात्र, डॉक्टरांनी तपासणीनंतर तिघांनाही मृत घोषित केले. या घटनेनंतर गोहे बुद्रुक गावावर शोककळा पसरली असून परिसरात हळहळ व्यक्त केली जात आहे. मृतांच्या कुटुंबीयांवर दुःखाचा डोंगर कोसळला आहे.

दरम्यान, अश्विनी वाळकोळी यांनी हे टोकाचे पाऊल का उचलले, याबाबत अद्याप कोणतीही ठोस माहिती समोर आलेली नाही. कौटुंबिक वाद, मानसिक तणाव किंवा इतर कोणते कारण या घटनेमागे आहे का, याचा तपास पोलीस करत आहेत. पोलिसांनी घटनेची नोंद करून पुढील तपास सुरू केला असून आत्महत्येमागील कारणांचा शोध घेतला जात आहे.