Pune Crime News : वाहतूक पोलिसाचं लाजिरवाणं कृत्य; भररस्त्यात नागरिक भयभीत

सचिन जाधव

Pune Traffic Police News : पुणे येथून एक मोठी बातमी समोर आली आहे. विश्रांतवाडी भागात वाहतूक शाखेतील एका पोलीस कर्मचाऱ्याने मद्याच्या नशेत दहशत माजविल्याची घटना उघडकीस आली आहे. (Crime News)

भर रस्त्यात तलवार उगारुन दहशत माजविणाऱ्या पोलीस कर्मचाऱ्याला निलंबित करण्याचे आदेश वाहतूक शाखेचे पोलीस (Traffic Police) उपायुक्त यांनी दिले आहेत. या प्रकरणी पोलीस कर्मचाऱ्याविरुद्ध विश्रांतवाडी पोलीस ठाण्यात गुन्हा दाखल करण्यात आला आहे.

मिळालेल्या माहितीनुसार, विजय उर्फ करण लक्ष्मण जाधव असे निलंबित केलेल्या पोलीस कर्मचाऱ्याचे नाव आहे.जाधव मुंढवा वाहतूक शाखेत नियुक्तीस आहे. धानोरीतील जाणता राजा चौकात जाधव तलवार घेऊन दहशत माजवित असल्याची माहिती विश्रांतवाडी पोलीस ठाण्यातील पथकाला मिळाली.पोलिसांनी त्याला पकडले. चौकशीत जाधव वाहतूक शाखेत पोलीस कर्मचारी असल्याचे उघडकीस आले.

तपासात जाधव याने मद्यपान केल्याचे निष्पन्न झाले. त्यानंतर त्याच्या विरुद्ध बेकायदा शस्त्र बाळगणे, सार्वजनिक ठिकाणी गोंधळ घातल्याप्रकरणी गुन्हा दाखल करण्यात आला आहे. जाधव याची चौकशी करण्यात आली आहे. जाधव याने पोलीस दलाची प्रतिमा मलिन केल्याने त्याला निलंबित करण्याचे आदेश काढण्यात आले आहेत.