Pune Crime News: मोबाईल, दागिने सोडून नको त्या गोष्टीची झाली चोरी; घटना CCTV कॅमेऱ्यात कैद

अक्षय बादवे, पुणे

Pune Theft News: पुण्यामधून चोरीची एक अजब घटना समोर आली आहे. आजवर तुम्ही मोबाईल, दागिने, नोटा अशा गोष्टी चोरल्याचं ऐकलं असेल. मात्र पुण्यातून चक्क एक चप्पल चोरल्याची घटना समोर आली आहे. चोरीची ही संपूर्ण घटना सीसीटीव्ही कॅमेऱ्यात कैद झाली आहे. (Theft of shoes)

मिळालेल्या माहितीनुसार, पुण्यातील खडकी भागातील एका दुकानातून तब्बल ५५ चप्पल आणि बूट जोड चोरट्यांनी लंपास केलेत. तीन जणांनी मिळून ही चोरी केली आहे. चोरट्यांनी ३० ते ४० हजार रुपयांचे ५५ चप्पलांचे जोड चोरी केलेत. यातील ४० मेन्स शूज तर १५ लेडीज चपलांचे जोड चोरट्यांनी चोरले आहेत.

हरेश आहुजा यांनी या प्रकरणात पोलिसात फिर्याद दिली होती. या चोरीचा तपास करताना पोलिसांनी सागर चांदणे, आकाश कपूर, अरबाज शेख या तिघांना अटक केली आहे.

पोलिसांनी दिलेल्या माहितीनुसार, आहूजा यांचे खडकी बाजार भागात चपलेचे गोडाऊन आहे. शनिवारी गोडाऊन बंद केल्यानंतर रात्री या तीन तरुणांनी गोडाऊनचे शटर उचकटून आत प्रवेश केला. नंतर हाताला दिसेल आणि मिळतील तसे बूट आणि चप्पल (Shoes) असे एकूण 55 चप्पल आणि बूट चोरी करून पसार झाले.

अशिक्षित असल्यामुळे या तरुणांनी उदरनिर्वाह तसेच दारू पिण्यासाठी ही चोरी (Theft) केल्याचं प्राथमिक तपासातून निष्पन्न झालं आहे. खडकी पोलिस ठाण्यात या तिघांवर गुन्हा दाखल करण्यात आला आहे.