पंतप्रधान नरेंद्र मोदी आज पुणे दौऱ्यावर; असा असेल संपूर्ण दौरा

प्राची कुलकर्णी

पुणे - पंतप्रधान नरेंद्र मोदी (Narendra Modi) आज पुणे (Pune) दौऱ्यावर आहेत. आज पुणे मेट्रोच्या वनाझ ते गरवारे या टप्प्याचं मोदींच्या हस्ते लोकार्पण होणार आहे. त्याच बरोबर नदीसुधार प्रकल्पाचीही सुरुवात पंतप्रधानांच्या हस्ते केली जाणार आहे. साधारण सकाळी १० च्या सुमारास पंतप्रधान मोदींचे पुण्यात आगमन होईल. त्यानंतर ते पुणे महापालिकेतील छत्रपती शिवाजी महाराजांच्या पुतळ्याचं लोकार्पण करतील.

हे देखील पहा -

त्यानंतर गरवारे इथं मेट्रोचं उद्घाटन करतील. तिथून ते मेट्रोने प्रवास करतील. त्यानंतर एमआयटी जवळ भाजप कडून सभा होणार आहे. त्यानंतर मोदी आर के लक्ष्मण गॅलरीचं उद्घाटन करुन सिम्बॅायसिस विद्यापीठाच्या सुवर्ण महोत्सवी वर्षाच्या सुरुवातीच्या कार्यक्रमाला हजेरी लावणार आहेत. त्यानंतर साधारण २.३० वाजता विमानतळाकडे रवाना होणार आहेत.

दरम्यान मोदींच्या दौऱ्या आधीच पुण्यातलं राजकारण तापलं आहे. अर्धवट प्रकल्पाचं उद्घाटन पंतप्रधान मोदी करत असल्याची टिका राष्ट्रवादीचे अध्यक्ष शरद पवार यांनी केली आहे. तर आज मोदींचा निषेध करण्यासाठी काँग्रेस आणि राष्ट्रवादी आंदोलन करुन काळे झेंडे दाखवणार आहे.

Edited By - Shivani Tichkule