डोंबिवलीत प्रदूषणाचा मुद्दा पुन्हा ऐरणीवर; हिरवा पाऊस, गुलाबी रस्ते…आता चॉकलेटी धूर? व्हिडिओ व्हायरल

संघर्ष गांगुर्डे, साम टीव्ही

डोंबिवली MIDC परिसरातील प्रदूषणाचा प्रश्न पुन्हा एकदा गंभीर बनला आहे. यावरून नागरिकांमध्ये तीव्र संताप व्यक्त होत आहे. काही वर्षांपूर्वी हिरवा पाऊस, तर कधी गुलाबी रंगाचे रस्ते यामुळे चर्चेत आलेल्या MIDC मध्ये आता थेट चेंबरमधून चॉकलेटी रंगाचा धूर बाहेर पडतानाचा व्हिडिओ सोशल मीडियावर व्हायरल झालाय.

व्हायरल व्हिडिओमध्ये MIDC परिसरातील ड्रेनेज/चेंबरमधून घनदाट, गडद रंगाचा धूर निघताना स्पष्टपणे दिसतोय. यामुळे परिसरातील हवेच्या गुणवत्तेबाबत गंभीर प्रश्न निर्माण झाले आहेत. स्थानिक नागरिकांच्या मते, रात्रीच्या वेळी औद्योगिक सांडपाणी आणि रासायनिक वायू सोडले जात असल्याचा संशय आहे.

या घटनेमुळे श्वसनाचे त्रास, डोळ्यांची जळजळ, दुर्गंधी अशा तक्रारींमध्ये वाढ होत असल्याचे नागरिक सांगतात. MIDC मध्ये नियम फक्त कागदावरच आहेत का? असा सवाल नागरिकांकडून उपस्थित केला जातोय. वारंवार तक्रारी करूनही महाराष्ट्र प्रदूषण नियंत्रण मंडळ आणि स्थानिक प्रशासनाकडून ठोस कारवाई होत नसल्याचा आरोप होत आहे.

तत्पूर्वी, या व्हिडिओची दखल घेत तत्काळ तपासणी करून संबंधित उद्योगांवर कठोर कारवाई करावी, अशी मागणी पर्यावरणप्रेमी आणि सामाजिक संघटनांकडून करण्यात येत आहे. जर वेळेत उपाययोजना केल्या नाहीत, तर MIDC परिसरातील प्रदूषण आरोग्यासाठी आणखी घातक ठरण्याची भीती व्यक्त केली जात आहे. डोंबिवली MIDC मधील प्रदूषणावर प्रशासन काय भूमिका घेते आणि व्हायरल व्हिडिओमागचे सत्य काय, याकडे आता संपूर्ण शहराचे लक्ष लागले आहे.