मंगेश काळोखेंना भररस्त्यात संपवलं; खोपोलीतील हत्येचा सीसीटीव्ही व्हिडिओ आला समोर

महाराष्ट्राला हादरवणाऱ्या मंगेश काळोखे हत्या प्रकरणाची मोठी अपडेट समोर आली आहे. शिंदे गटाच्या नगरसेविका मानसी यांचे पती मंगेश काळोखे यांच्या हत्याकांडाचा सीसीटीव्ही व्हिडिओ समोर आला आहे. काळोखे यांची भर रस्त्यात पाच जणांनी मिळून धारदार शस्त्राने हत्या केली. या हत्या प्रकरणाचा सीसीटीव्ही व्हिडिओ समोर आल्याने राजकीय वर्तुळात खळबळ उडाली आहे.

मंगेश काळोखे हत्या प्रकरणात पोलिसांनी कारवाईचा धडाका लावला आहे. पोलिसांनी प्रत्यक्ष हत्या करणारे आणि कट रचणारे अशा एकूण १० जणांवर गुन्हा दाखल केला आहे. या प्रकरणी पोलिसांनी आतापर्यंत अजित पवार गटाचे रायगड जिल्हाध्यक्ष सुधाकर परशुराम घारे यांच्या सह एकूण दहा जणांवर गुन्हा दाखल केलाय. तर पोलिसांनी आतापर्यंत ७ आरोपींना अटक केली आहे. याच हत्याकांडाचा सीसीटीव्ही व्हिडिओ समोर आल्याने पोलिसांच्या कारवाईला आणखी गती मिळण्याची शक्यता आहे.

सीसीटीव्ही व्हिडओमध्ये काय दिसत आहे?

मंगेश काळोखे रस्त्यावर पळताना दिसत आहेत. दहशतीत असलेले मंगेश काळोखे सैरावैरा पळताना दिसताहेत. पळताना मंगेश काळोखे अचानक रस्त्यावर पडले. त्यानंतर त्यांच्या मागावर असलेल्या ५ जणांनी तातडीने धारदार शस्त्राने हल्ला केला. पाचही जणांनी त्यांच्यावर धारदार शस्त्राने वार केले.

या हल्ल्यात काळोखे यांना गंभीर जखमी केल्यानंतर मारेकऱ्यांनी घटनास्थळावरून पळ काढला. यावेळी रस्त्यावर लोकांची तुरळक संख्या होती. हल्ला करताना कोणीही त्यांना वाचवायला पुढे आलं नाही. काळोखे गंभीर जखमी झाल्यानंतर मारेकऱ्यांनी घटनास्थळावरून पळ काढला. या हत्याकांडाने खोपोलीसह महाराष्ट्र हादरून गेला आहे.