Pimpri-Chinchwad : हातात चाकू, तोंडावर मास्क, पिंपरी चिंचवडमधल्या 'मास्क-मॅन'चा चेहरा समोर; VIDEO

गोपाळ मोटघरे, साम टीव्ही, प्रतिनिधी

Pimpri-Chinchwad News : पिंपरी चिंचवड शहरात हातात चाकू घेऊन एक मास्क मॅन फिरत होता. या मास्कमॅनची माहिती पोलिसांनी मिळाली. त्यानंतर चाकू घेत रस्त्यावर फिरणाऱ्या मास्क मॅनला पोलिसांनी ताब्यात घेतले. लोकांमध्ये दहशत निर्माण करणारे वर्तन असलेल्या पिंपरी चिंचवड शहरातील मास्क मॅनचे रहस्य उलगडल्याची माहिती समोर आली आहे.

मिळालेल्या माहितीनुसार, पिंपरी चिंचवडच्या निगडी येथे हातात चाकू घेत एकजण फिरत होता. त्याच्या तोंडावर मास्क लावलेला होता. या मास्क मॅनची माहिती मिळताच अगदी काही तासांच्या आत निगडी पोलिसांनी या मास्क मॅनला ताब्यात घेतले. हातात धारदार चाकू घेऊन फिरणारा मास्क मॅन हा मनोरुग्ण भंगार वेचक असल्याचे म्हटले जात आहे.

निगडी पोलिसांनी दिलेल्या माहितीनुसार, मच्छिंद्र नारायण नवघिरे (वय ६८ वर्ष) असे मास्क मॅनचे नाव आहे. मच्छिंद्र नारायण नवघिरे हे कचरा आणि भांगर वेचक आहेत. कचऱ्यातील भंगार वेचून आणि ते विकून ते आपला उदरनिर्वाह करतात. त्याची मानसिक स्थिती बिघडल्याने तो धारदार चाकू घेऊन रस्त्यावरुन फिरत होता.

पोलिसांनी मच्छिंद्र नारायण नवघिरे यांची चौकशी केली. त्यात मच्छिंद्र हे मनोरुग्ण असल्याचे पोलिसांना समजले. पण त्यांचे हे वागणे दहशत निर्माण करणारे असल्याने निगडी पोलिसांनी त्यांना समजपत्र दिले आहे. पोलिसांनी समज देऊन कथित मास्क मॅन मच्छिंद्र नारायण नवघिरे यांना सोडून दिल्याचे म्हटले जात आहे.