Panvel Accident : पनवेलमध्ये एसटी बसला मोठा अपघात, चालकाचे नियंत्रण सुटले अन् बस झाडावर आदळली; पाहा थरारक VIDEO

सिद्धेश म्हात्रे, साम टीव्ही, प्रतिनिधी

पनवेलमध्ये एका एसटी बसचा भीषण अपघात झाल्याची माहिती समोर आली आहे. चालकाचे बसवरील नियंत्रण सुटल्याने हा अपघात झाल्याचे म्हटले जात आहे. या अपघातामध्ये एसटी बसच्या पुढच्या भागाचे प्रचंड नुकसान झाले आहे. तर चार जण जखमी झाले आहेत. अपघाताची ही घटना सीसीटीव्ही कॅमेऱ्यामध्ये कैद झाली आहे.

मिळालेल्या माहितीनुसार, पनवेल तालुक्यातील कोन गावाच्या फाट्याजवळ एसटी बसचा मोठा अपघात झाला आहे. ही एसटी बस शेडुंगहून पनवेलला जात होती. या दरम्यान बसचालकाचे बसवरचे नियंत्रण सुटले. एसटी बस रस्त्याच्या बाजूला असलेल्या एका मोठ्या झाडावर जाऊन आदळली आणि उलटली.

दरम्यान रस्त्याजवळच्या सीसीटीव्ही कॅमेऱ्यामध्ये हा अपघात कैद झाला आहे. या व्हिडीओमध्ये एसटी बस वेगाने रस्त्याच्या कडेला येत असल्याचे दिसते. ही बस रस्त्यालगतच्या झाडावर जाऊन आदळल्याचेही व्हिडीओमध्ये पाहायला मिळते. बस झाडावर इतक्या जोरात धडकली, की झाड आणि त्याच्या आसपास असलेल्या गोष्टीचे नुकसान झाले.

बसचालकाचे नियंत्रण सुटल्याने ही एसटी बस झाडावर आदळली. अपघातामध्ये बसच्या पुढच्या भागाचे मोठे नुकसान झाल्याची माहिती समोर आली आहे. तसेच बसमधील ४ जण जखमी झाले आहेत. जखमींना जवळच्या खासगी रुग्णालयात दाखल करण्यात आले आहे. पनवेल तालुका पोलीस या अपघाताचा तपास करत आहेत.