मुंबईत होणार संतपरंपरेचा जागर; वरळीत ‘पादुका दर्शन महोत्सव’

मुंबईच्या वरळीत संतपंरपरेचा गौरव आणि आध्यात्मिक विचारांची जागृती करण्यासाठी 'सकाळ माध्यम समूहा'कडून ‘पादुका दर्शन महोत्सवा’चे आयोजन करण्यात आलं आहे. मुंबईच्या वरळीतील एनएससीआय डोम शनिवारी आणि रविवारी सकाळी ९ ते रात्री ९ या वेळेत महोत्सव पार पडणार आहे.

वरळीतील महोत्सवात समाजाला दिशा देणाऱ्या संताच्या कार्याचा जागर केला जाणार आहे. संतांनी दिलेल्या समता, माणुसकी आणि वसुधैव कुटुंबम्'ची शिकवण बदलत्या जीवनशैलीत महत्वाची ठरू लागली आहे. या पार्श्वभूमीवर भाविकांना संताच्या पादुकांचे दर्शन करण्याची संधी मिळणार आहे. त्याचबरोबर संताच्या विचारांशी जोडले जाण्याची संधी मिळणार आहे.

राज्यभरातील विविध भागातील भाविक मोठ्या संख्येने उपस्थित राहाणार आहेत. तसेच विविध हरिपाठ मंडळे आणि संस्थांचा सहभाग देखील पाहायला मिळेल. नागेश्वर नवनाथ ध्यानमंदिरचे अध्यक्ष ह.भ.प. संतोष अर्जुन केणे, संत सावळाराम बाबा हरिपाठ मंडळ (आयरे गाव) यांच्या रोहिणी पाटील, श्री सिद्धी गणेश मंदिर हरिपाठ मंडळ कोळेगावचे ह.भ.प. प्रेमनाथ पाटील व मंदा पाटील, भगवान जगन्नाथ गोपाल कृष्ण ट्रस्टचे गुरुनाथ म्हात्रे, विठ्ठल मंदिरचे ह.भ.प. बालकृष्ण महाराज तसेच ह.भ.प. अजय महाराज (मांगलूर) यांची हजेरी पाहायला मिळणार आहे.

वरळीतील महोत्सव केवळ धार्मिक सोहळा नाही. तर सामाजिक ऐक्य, परंपरेचे जतन आणि आध्यात्मिक ऊर्जा देणारा उत्सव ठरणार आहे. या सोहळ्याला भाविकांनी सहकुटुंब उपस्थित राहावे. तसेच भक्तिमय सोहळ्याचा लाभ घ्यावा, असे आवाहन आयोजकांकडून करण्यात येत आहे.