दापोलीतील रिसॉर्ट अनिल परबांचे; किरीट सोमय्यांचा दावा

मुंबई: शिवसेना (Shivsena) नेते आणि महाविकास आघाडी सरकारमधील मंत्री अनिल परब (Anil Parab) यांच्या निवासस्थानासह ७ ठिकाणी ईडीकडून छापेमारी सुरू आहे. आज सकाळी ६ वाजेदरम्यान, ईडीचे पथक (ED Raids) अनिल परबांच्या घरी पोहचलं, तेव्हापासून ही कारवाई सुरू आहे. या पथकात जवळपास ४ अधिकारी असल्याची माहिती आहे. दरम्यान या छाप्यावरुन आता आरोप प्रत्यारोप सुरु आहेत, भाजप नेते किरीट सोमय्या यांनीही अनिल परब यांच्यावर आरोप केले आहेत. दापोलीतील हे रिसॉर्ट अनिल परब यांचेच असल्याचे आता समोर आले असल्याचा आरोप सोमय्या यांनी केला.

दापोलीतील रिसॉर्ट अनिल परब यांचेच आहे, हे आजच्या धाडीत समोर आले आहे. या रिसॉर्ट मधील लाईटचे मीटर हे अनिल परब (Anil Parab) यांच्या नावावर आहे. यांची ही संपत्ती बेनामी असल्याची जाहीर करण्याची मागणी मी केलेली आहे, काळा पैसा दापोलीतील गुंतवला आहे, असा आरोप किरीट सोमय्या (Kirit Somaiya) यांनी अनिल परब यांच्यावर केला आहे.

बेनामी प्रॉपर्टी अंतर्गत अनिल परब (Anil Parab) यांच्यावर कारवाई केली पाहिजे. या रिसॉर्टसाठी काळ्या पैशाचा वापर केला. पर्यावरण मंत्रालयाने यावर कारवाई सुरु केली आहे. मागिल महिन्यात दापोली पोलिसात तक्रार दाखल केली. पोलिसांच्या (Police) बदल्यांचा पैसा या रिसॉर्टमध्ये गुंतवला आहे, असंही सोमय्या म्हणाले. २ मे २०१७ ला १ कोटी १० लाखात ही जमीन विकत घेतली. ही जागा घेताना सीआरझेड होत माहित होते. समुद्राच्या बाजूला असल्याने नियमाने एनए होत नाही. तरीही यांनी सरकारचा दबाव वापरुन एनए करुन घेतले आहे. त्यामुळे यांच्यावर कारवाई व्हायला पाहिजे अशी मागणी, सोमय्या (Kirit Somaiya) यांनी केली आहे.

पोलिसांच्या बदलीचा पैसा रिसॉर्टसाठी वापरला

देशात १०० टक्के लॉकडाऊन होता तेव्हा अनिल परब दापोलीत रिसॉर्ट बांधत होते. मला खात्री आहे अनिल परब यांच्यावर कारवाई होणार आहे, असंही सोमय्या म्हणाले. क्राईम मनीचा वापर या रिसॉर्टसाठी झाला आहे. पोलिसांच्या बदलीचा पैसा गोळा केला आहे, तो पैसा या रिसॉर्टसाठी लावला आहे. त्यामुळे त्यांच्यावर कारवाई व्हायला पाहिजे, असंही सोमय्या म्हणाले. परब यांना अटक होणार हे नक्की असल्याचे सोमय्या (Kirit Somaiy) म्हणाले.