Maharashtra Politics: राष्ट्रवादी काँग्रेसमध्ये उलटफेर होणार; मुंबई शहर अध्यक्षपदी 'या' नेत्याची लागणार वर्णी, चर्चांना उधाण

राष्ट्रवादी काँग्रेसच्या अजित पवार गटात नेतृत्वाची सूत्रे सुनेत्रा पवारांकडे गेल्यानंतर पक्षाच्या संघटनात्मक रचनेत बदल होत आहेत. या पार्श्वभूमीवर मुंबई राष्ट्रवादी काँग्रेसच्या अध्यक्षपदाबाबतही मोठा निर्णय होण्याची शक्यता व्यक्त केली जातेय. मुंबई अध्यक्षपदावर झिशान सिद्दीकी यांची वर्णी लागण्याची शक्यता राजकीय वर्तुळात रंगत आहे.

अध्यक्ष निवडीच्या प्रक्रियेत पार्थ पवार लक्ष घालत असल्याने सिद्दीकी यांना मुंबई शहर प्रमुखाची जबाबदारी मिळू शकते, अशी दाट शक्यता आहे. पार्थ पवार यांचा पक्षाच्या निर्णय प्रक्रियेत वाढता सहभागही चर्चेचा विषय ठरू लागलाय.

झिशान सिद्दीकी कोण आहेत?

झिशान सिद्दीकी हे दिवंगत बाबा सिद्दीकी यांचे पुत्र आहेत. त्यांनी २०१९ मध्ये वांद्रे पूर्व मतदारसंघातून काँग्रेसच्या तिकिटावर विधानसभा निवडणूक जिंकली होती. २०२४ मध्ये त्यांनी अजित पवार यांच्या नेतृत्वाखालील राष्ट्रवादी काँग्रेसमध्ये प्रवेश केला. सध्या ते राष्ट्रवादी काँग्रेसचे विधान परिषद सदस्य आहेत.

मे २०२६ पासून त्यांचा विधान परिषद कार्यकाळ सुरू झालाय. विधान परिषदेच्या निवडणुकीत राष्ट्रवादी काँग्रेसच्या वाट्याला आलेल्या एका जागेसाठी अनेक इच्छुकांची नावे चर्चेत होती. मात्र पक्षाने झिशान सिद्दीकी यांना संधी दिली. त्यानंतर आता थेट मुंबई राष्ट्रवादीच्या अध्यक्षपदाची जबाबदारीही त्यांच्याकडे सोपवली जाण्याची शक्यता आहे.

राष्ट्रवादी अजित पवार गटाला खिंडार

अजित पवार गटाचे ठाणे शहर युवक अध्यक्ष विरू वाघमारे यांनी राष्ट्रवादीला रामराम ठोकत शरद पवार गटात प्रवेश केलाय. वाघमारे यांच्यासह हेमंत वाणी यांनीही अजित पवार गटाला रामराम ठोकलाय. ठाणे शहरातील राष्ट्रवादी (अजित पवार)चे नेतृत्व कार्यकर्त्यांना योग्य तो सन्मान देत नसल्याचा आरोप करीत युवक अध्यक्ष विरू वाघमारे, सरचिटणीस हेमंत वाणी यांनी बुधवारी सायंकाळी शरद पवार गटात प्रवेश केला आहे.