Navi Mumbai: 'मराठी बोलता है' फैझानच्या टोळक्याकडून मराठी तरूणाला मारहाण; हॉकी स्टिकनं काळंनिळं होईपर्यंत मारलं

विकास मिरगणे, साम टिव्ही प्रतिनिधी

कल्याणमध्ये परप्रांतीय तरुणाने मराठी तरुणीला रुग्णालयातच मारहाण केल्याच्या घटनेनंतर राज्यभर संतापाची लाट उसळली होती. अशातच आता नवी मुंबईच्या वाशी परिसरातून आणखी एक धक्कादायक घटना समोर आली आहे. मराठीत बोलतो म्हणून, एका तरूणाला अमराठी मुलानं हॉकी स्टिकनं मारहाण केली. या घटनेनंतर परिसरात खळबळ उडाली आहे.

वाशीमधील एका कॉलेजमध्ये हा धक्कादायक प्रकार घडला. एका मराठी तरूणाला, मराठी भाषेत बोलतो म्हणून मारहाण करण्यात आली. त्याच्याच वर्गातील फैझान नाईक या अमराठी मुलाने आणि त्याच्या मित्रांनी मारहाण केली. मारहाण करण्यासाठी त्यांनी हॉकी स्टिकचा वापर केला होता.

या भयंकर मारहाणीत तरूणाला गंभीर दुखापत झाली आहे. मारहाण झाल्यानंतर त्याला तातडीनं रूग्णालयात दाखल करण्यात आले आहे. तर, फैझान नाईक आणि त्याचे मित्र अजूनही मोकाट असल्याची माहिती आहे. वाशी पोलीस ठाण्यात गुन्हा दाखल करण्यात आला असून, मात्र, अद्याप त्यांच्यावर कोणतीच कारवाई करण्यात आलेली नाही.

या घटनेनंतर मनसे प्रवक्ते आणि शहर अध्यक्ष गजानन काळे हे आज पीडित तरूणाची भेट घेणार आहेत. तसेच ११ वाजता वाशी पोलीस ठाण्यात जाऊन पोलिसांची भेट घेऊन घडलेल्या घटनेवर चर्चा करणार आहेत. दरम्यान, या घटनेनंतर परिसरात खळबळ उडाली असून, पुढील तपास सुरू आहे.