CIDCO Lottery 2024: गुड न्यूज! म्हाडापाठोपाठ सिडकोच्या घरांच्या किमती १० टक्क्यांनी कमी होणार?

म्हाडापाठोपाठ आता सिडकोची घरं देखील स्वस्त होणार असल्याची माहिती सुत्रांनी दिली आहे. सिडकोच्या घरांच्या किमती म्हाडाप्रमाणेच १० टक्क्यांनी कमी होणार असल्याचे सांगितले जात आहे. त्यामुळे नवी मुंबईत सिडकोच्या घरांसाठी अर्ज करणाऱ्यांसाठी ही आनंदाची बातमी आहे. लवकरच नवी मुंबईतील सिडकोच्या ४० हजार घरांसाठी लॉटरी निघणार आहे.

म्हाडाप्रमाणे सिडको देखील घराच्या किंमती स्वस्त करण्याच्या तयारीमध्ये आहे. नवी मुंबईत दसऱ्याच्या शुभ मुहूर्तावर सिडकोच्या घरांची बंपर लॉटरी निघणार आहे. नवी मुंबईतील विविध नोडमध्ये तसेच रेल्वे स्थानकाजवळ असलेल्या तब्बल ४० हजार घरांची लॉटरी निघणार आहे. वाशी, सानपाडा, जुईनगर, खांदेश्वर आणि नेरूळ या रेल्वे स्थानकांजवळ सिडकोची ही घरं असणार आहे.

सिडकोने नवी मुंबईतील विविध ठिकाणी आणि रेल्वे स्टेशनजवळ तब्बल ४० हजार घरांची निर्मिती केली आहे. नवी मुंबईत घर असावे असे स्वप्न पाहणाऱ्या नागरिकांसाठी ही खास पर्वणी ठरणार आहे. या लॉटरीमध्ये ग्राहकांना कोणत्या मजल्यावर कोणत्या क्रमांकाचे घर पाहिजे हे निवडण्याची खास मुभा देण्यात आली आहे. जर सिडकोने म्हाडाप्रमाणे घरांच्या किमती कमी केल्या तर या घरांसाठी अर्ज करणाऱ्यांचे प्रमाण आणखी वाढेल.