Navi Mumbai Metro: मेट्रोच्या तिकीट दरात मोठी कपात, नवी मुंबईकरांना दिलासा; जाणून घ्या नवे दर

नवी मुंबईकरांसाठी आनंदाची बातमी आहे. नवी मुंबईकरांना गणपती बाप्पा पावला आहे. कारण नवी मुंबईकरांचा मेट्रो प्रवास आता आणखी सुखकारक होणार आहे. मेट्रोच्या तिकीट दरामध्ये कपात करण्यात आली आहे. येत्या शनिवारपासून म्हणजे गणेशोत्सवाला सुरूवात झाल्यापासून नवी मुंबई मेट्रोसाठी तिकीटाचे नवे दर लागू होतील. या नव्या दरानुसार नवी मुंबईकरांना कमी किमतीमध्ये आता मेट्रो प्रवास करता येणार आहे.

जलद प्रवासाचा पर्याय असणाऱ्या नवी मुंबई मेट्रोचा लाभ अधिकाधिक प्रवाशांना घेता यावा यासाठी सिडकोकडून मेट्रोच्या तिकीट दरामध्ये कपात करण्यात आली आहे. सिडकोचे व्यवस्थापकीय संचालक विजय सिंघल यांनी ही माहिती दिली आहे. सिडकोने बेलापूर ते पेंधर मार्गावरील नवी मुंबई मेट्रोच्या तिकीट दरांमध्ये ३३ टक्क्यांपर्यंत कपात केली आहे. त्यामुळे उद्यापासून नवी मुंबईकरांना कमी पैशात मेट्रोचा प्रवास करता येणार आहे. सिडकोने जारी केलेल्या नव्या दरानुसार मेट्रोचे किमान दर १० तर कमाल दर ३० रुपये असणार आहे.

नवी मुंबई मेट्रोचे सुधारित दर -

- पहिल्या २ आणि २ ते ४ किलोमीटरसाठी - १० रुपये

- ४ ते ६ आणि ५ ते ७८ किलोमीटरसाठी - २० रुपये

- ८ ते १० किलोमीटरच्या टप्प्यासह त्यापुढील अंतराकरिता - ३० रुपये

नवी मुंबई मेट्रो प्रकल्पांतर्गत सिडकोने बेलापूर ते पेंधरदरम्यान मार्ग क्रमांक १ विकसित केला आहे. हा मार्ग सीबीडी बेलापूर ते तळोजा येथील गृहसंकुलांना दळणवळणाच्या दृष्टीने खूपच फायदेशीर ठरणार आहे. नव्या तिकीट दरांमुळे जवळ आणि लांबच्या अंतरावर प्रवास करणाऱ्या प्रवाशांना त्याचा लाभ होणार आहे. याआधी बेलापूर ते पेंधर दरम्यानच्या अंतरासाठी ४० रुपये मोजावे लागत होते. आता प्रवाशांना हा प्रवास फक्त ३० रुपयांमध्ये करता येणार आहे.